یونائیٹڈ فرنٹ دا افغان طالبان خلاف جنگ دا آغاز

امریکا، نیٹو تے دوجے ملکاں توں افغان طالبان خلاف سیاسی حمایت دی اپیل، ساڈیاں فوجاں القاعدہ، داعش تے ٹی ٹی پی خلاف وی لڑ رہیاں نیں: جنرل سمیع

اسلام آباد (مانیٹرنگ ڈیسک) افغان شمالی اتحاد دی تنظیم یونائیٹڈ فرنٹ آف افغانستان دے سربراہ جنرل سمیع سادات نے افغان طالبان دے خلاف جنگ دا آغاز کر دتا جد کہ امریکا، نیٹو تے دوجے ملکاں توں افغان طالبان دے خلاف سیاسی حمایت دی اپیل کر دتی۔ افغان جنرل سمیع سادات نے اک ویڈیو وچ کہیا اے کہ اوہناں دی تنظیم نے افغان طالبان دے خلاف مسلح سرگرمیاں دا آغاز قندھار توں کر دتا اے۔ اوہناں نے کہیا کہ ساڈیاں فوجاں صرف طالبان دے خلاف نہیں بلکہ القاعدہ، داعش تے تحریک طالبان پاکستان دے خلاف وی لڑ رہیاں نیں۔

اوہناں دا کہنا سی کہ گوانڈھیاں لئی مسئلے پیدا نہیں کرنا چاہندے۔ اسیں اپنا مستقبل تہاڈے نال دیکھدے آں۔ اسیں تہاڈے خلاف نہیں آں، طالبان تہاڈے خلاف نیں۔ سمیع سادات نے کہیا کہ طالبان دے خلاف جنگ وچ اوہناں دیاں فوجاں بین الاقوامی قانوناں دی پابندی کرن گیاں تے اوہ اپنی کارروائیاں لئی کسی دوجے ملک توں اجازت نہیں لین گے۔ اوہناں دا کہنا سی کہ اسیں صرف طالبان دے اقتدار توں آزادی چاہندے آں۔ عالمی برادری توں مطالبہ کردے آں کہ اوہ تاریخ دے صحیح پاسے کھلووے۔