انسدادِ منشیات لئی تعلیمی ادارے نگرانی دا نظام بناؤن: قائمہ کمیٹی
اسلام آباد (خصوصی رپورٹر) قومی اسمبلی دی قائمہ کمیٹی وفاقی تعلیم و پیشہ ورانہ تربیت نے ملک بھر دے تعلیمی اداریاں وچ منشیات دے ودھدے رجحان تے شدید تشویش دا اظہار کردیاں کہیا اے…
صرف طالب علماں خلاف تادیبی کارروائیاں ایس سنگین مسئلے دا حل نہیں بلکہ تعلیمی اداریاں، انسدادِ منشیات فورس، پولیس تے متعلقہ اداریاں نوں منشیات فروش نیٹ ورکاں خلاف مشترکہ تے انٹیلی جنس مبنی کارروائیاں کرنا ہون گیاں۔ قائم مقام چیئرپرسن مہتاب اکبر راشدی دی صدارت ہیٹھ اجلاس وچ کمیٹی نے زور دتا کہ تعلیمی ادارے منشیات دی ترسیل تے استعمال دی روک تھام لئی مؤثر نگرانی دا نظام قائم کرن، داخلی احتساب مضبوط بناؤن تے اپنی ادارہ جاتی ذمہ داری پوری کرن۔ قومی کمیشن برائے انسانی ترقی نے دسیا کہ اسلام آباد کیپٹل ٹیریٹری دیاں 36 یونین کونسلاں وچ سکولوں باہر تقریباً 26 ہزار بچےآں دی نشاندہی کیتی گئی۔
جنہاں وچوں 18 ہزار دے قریب بچےآں نوں غیر رسمی تعلیم دے مرکزاں وچ داخل کیتا جا چکا اے۔ اجلاس وچ این سی ایل ای ایکس نرسنگ ٹریننگ پروگرام تے تحفظات دا اظہار کیتا گیا، کمیٹی نے فیصلہ کیتا کہ پاکستان نرسنگ اینڈ مڈوائفری کونسل نوں اگلے اجلاس وچ سڈیا جائے تاکہ پروگرام دے ڈیزائن، عملدرآمد، منظوری تے قومی نرسنگ دے معیارات حوالے نال پیشہ ورانہ رائے حاصل کیتی جا سکے۔ قائمہ کمیٹی نے وفاقی اردو یونیورسٹی آف آرٹس، سائنس اینڈ ٹیکنالوجی دے معاملیاں دے حل وچ مسلسل تاخیر تے سخت برہمی دا اظہار کردیاں ہدایت کیتی کہ ایچ ای سی نویں کمیٹی توں دو مہینیاں اندر اپنی رپورٹ مکمل کروائے۔
