سڈݨ تے آؤندے نہیں، عدالت رجسٹرار نرسنگ تے برہم

کوئی نوٹس وصول نہیں کردا، کیوں نہ توہینِ عدالت دی کارروائی کریئے، جسٹس ارباب، نان ایم ٹیگ یا گھٹ بیلنس تے 50 فیصد اضافی ٹول ٹیکس وصولی روکن دے حکم وچ توسیع

اسلام آباد (اپنے نامہ نگار توں) اسلام آباد ہائیکورٹ دے جسٹس ارباب محمد طاہر نے طلبی دے باوجود پیش نہ ہون تے رجسٹرار نرسنگ کونسل تے برہمی دا اظہار کردیاں ریمارکس دتے کہ عدالت طلب کردی اے تے تسیں لوک آؤندے نہیں، ایس ایچ او بھیج کے تہانوں بلوانا پیا، کیوں نہ توہینِ عدالت دی کارروائی کریئے، کونسل ملازمین فیاض وغیرہ دی درخواست تے سماعت دوران عدالتی طلبی تے رجسٹرار نرسنگ کونسل عدالت پیش ہوئیاں، جسٹس ارباب محمد طاہر نے رجسٹرار نرسنگ کونسل توں کہیا عدالت نے تہانوں نوٹس بھیجے تسیں جواب کیوں نہیں دتا، تہانوں کئی وار بلایا وی گیا پر کوئی نوٹس تک وصول نہیں کردا، رجسٹرار نرسنگ کونسل نے کہیا میرے علم وچ نہیں سی، ہن پتہ لگیا تاں آ گئی، میرے آؤن توں پہلے ہی ڈیلی ویجز ملازمین دا داخلہ بند کر دتا گیا سی۔

جسٹس ارباب محمد طاہر نے کہیا تہاڈے نال تعلق رکھدے کئی کیس عدالت وچ زیرِ سماعت نیں، کونسل ولوں عدالتی احکامات نوں مسلسل نظر انداز کیتا جاندا اے، جسٹس ارباب محمد طاہر نے ہدایت کیتی کہ اگلی سماعت تک پیراوائز کمنٹس جمع کرواؤ، زیرِ سماعت دوجے کیساں تے وی توجہ دیو تاکہ کیس نبڑائے جا سکن۔ ایس توں علاوہ فاضل عدالت نے موٹروے تے اضافی وصولیاں تے جرمانے خلاف کیس وچ این ایچ اے ولوں عدالتی حکم تے عملدرآمد شروع ہو جان تے نان ایم ٹیگ یا گھٹ بیلنس تے 50 فیصد اضافی ٹول ٹیکس وصولیاں توں روکن دے حکم وچ توسیع کردیاں دلائل طلب کر لئے۔