شمالی وزیرستان: قدرتی گیس ویچن لئی بولی کامیابی نال پوری
کراچی (کامرس رپورٹر) خیبر پختونخوا دے ضلع شمالی وزیرستان وچ واقع اسپن وام گیس دی دریافت توں نکلن والی قدرتی گیس نوں ویچن لئی بولی دا کم کامیابی نال پورا کر لیا گیا اے۔
ماڑی انرجیز لمیٹڈ نے ایس پیشرفت بارے ضروری جانکاری پاکستان اسٹاک ایکسچینج نوں بھیج دتی اے۔ کمپنی ولوں جاری خط دے مطابق اسپن وام گیس توں قدرتی گیس ویچن لئی صاف شفاف مسابقتی کم پورا ہون اتے یونیورسل گیس ڈسٹری بیوشن کمپنی نوں کامیاب بولی دہندہ مندیاں ہویاں لیٹر آف ایوارڈ جاری کر دتا گیا اے۔ خط وچ دسویا گیا اے کہ اسپن وام گیس فیلڈ توں روزانہ 17.5 ملین مکعب فٹ قدرتی گیس ویچی جائے گی، جیندے نال نہ صرف دیس اندر توانائی دیاں لوڑاں پوریاں کرن وچ مدد ملے گی بلکہ دیس وچ موجود گیس دے وسائل نوں چنگے طریقے نال ورتن نوں وی ودھاوا ملے گا۔
ماڑی انرجیز دے مطابق گیس نوں ویچن تے سپلائی کرن دا سارا کم وفاقی حکومت دے 7 جنوری 2025 دے فریم ورک فار سیل آف گیس ٹو تھرڈ پارٹیز دے تحت پورا کیتا گیا اے۔ ایس دا مقصد نویں لبھی گئی گیس نوں جلدی کمرشل بنیاداں اتے مارکیٹ تک پچانا تے نجی شعبے دی شمولیت نوں ودھانا اے۔ توانائی دے ماہرین دا کہنا اے کہ اسپن وام توں گیس دی کمرشل وکری دی شروعات پاکستان دے گیس سیکٹر لئی چنگی پیشرفت اے۔ ایس نال شمالی وزیرستان وچ نویں دریافتاں نوں معاشی کماں وچ بدلن، مقامی صنعت نوں ایندھن دی سپلائی بہتر کرن، باہروں منگوائے جان والے ایندھن اتے انحصار گھٹ کرن تے دیس دے توانائی دے شعبے وچ سرمایہ کاری دے نویں موقعے ملن دی امید اے۔
