ایل اے 37، دھاندلی دی تحقیقات کروایئاں جادن: مرکزی مسلم لیگ
لاہور (سیاسی نمائندہ): ن لیگ ایہ نشست جتی نہیں بلکہ جتائی گئی اے: خالد نیک گجر، مزمل اقبال تے دوجے رہنما۔ ویڈیو تے دوجے ثبوت الیکشن کمیشن اگوں پیش کیتے جان گے: دانیال عزیز۔
مرکزی مسلم لیگ دے رہنماواں نے منگ کیتی اے کہ ایل اے 37 جموں 4 اندر ہون والی مبینہ انتخابی دھاندلی دی جانچ پڑتال کر کے، لوڑ پین اتے حلقے اندر دوبارہ انتخابات کروائے جان، ن لیگ ایہ نشست جتی نہیں بلکہ جتائی گئی اے جدوں کہ اینہاں دے امیدوار عثمان علیم نوں صاف برتری حاصل سی، پر اینہاں نوں 61 پولنگ سٹیشناں دے فارم 24 مہیا نہیں کیتے گئے۔
ایہ منگ مرکزی مسلم لیگ دے ڈپٹی سیکرٹری جنرل خالد نیک گجر، مرکزی ترجمان ڈاکٹر مزمل اقبال ہاشمی، پیر اعجاز الحسن شاہ، جنرل سیکرٹری مرکزی مسلم لیگ نارووال عرفان مہیس، امیدوار عثمان علیم، صدر مسلم یوتھ لیگ تابش قیوم نے سابق وفاقی وزیر دانیال عزیز نال رل کے لاہور دے مقامی ہوٹل اندر سانجھی پریس کانفرنس ویلے کیتی۔ ایں موقعے اتے آزاد کشمیر دے مذکورہ حلقے اندر مبینہ انتخابی دھاندلی، انتطامیہ ولوں لیگی امیدوار دی حمایت تے دوجیاں انتظامی گڑبڑاں نال جڑی ست منٹ دی ویڈیو سمیت وکھو وکھ دستاویز ثبوت میڈیا اگوں پیش کیتے گئے۔
دانیال عزیز نے آکھیا کہ انتخابی کم دے دوران وڈیاں گڑبڑاں کیتیاں گئیاں تے فارم 45 توں فارم 47 تیکر دے مرحلے نوں صاف ستھرے انداز اندر پورا نہیں ہون دتا گیا، ویدیو، فارم تے دوجے دستاویز ثبوت الیکشن کمیشن اگوں پیش کیتے جان گے، ذمےوار بندیاں دے خلاف کارروائی کیتی جاوے تے جے لوڑ ہووے تاں حلقے اندر دوبارہ پولنگ کروائی جاوے۔
مرکزی ترجمان ڈاکٹر مزمل اقبال ہاشمی نے آکھیا کہ انتخابی کم دے دوجے مرحلے اندر وڈے پدھر اتے گڑبڑاں ہوئیاں۔ بہتے پولنگ سٹیشناں اتے پولیس نے پولنگ ایجنٹاں نوں ووٹاں دی گنتی توں پہلاں ہی باہر کڈھ دتا۔ انہوں نے آکھیا کہ پیپلز پارٹی دی پریس کانفرنس اندر وی ایسی ویدیوہ سامنے آیاں نیں جِنہاں اندر مبینہ طور اتے جعلی انتخابی سامان، مہریں تے دوجے ثبوت وکھائے گئے نیں۔ اینہاں دا آکھਣਾ سی کہ انتخابی کم دی صفائی لئی قانونی تے جمہوری جدوجہد جاری رکھی جاوے گی۔
