فیلڈ مارشل نوں مون سون دیاں آفتانسے نمٹن تے بریفنگ
فوجاں قدرتی آفتان دے دوران ریسکیو، بحالی وِچ تعاون لئی ہر ویلے تیار: عاصم منیر، اداریاں دے وچالے ہم آہنگی تے بروقت فیصلے ڈاڈھے اہم، این ای او سی دے دورے تے گل بات
راولپنڈی (خصوصی نیوز رپورٹر) فیلڈ مارشل سید عاصم منیر نے کہیا اے کہ مون سون دے دوران کسے وی ہنگامی صورتحال نال موثر انداز وِچ نمٹن لئی مکمل تیاری، اداریاں دے وچالے مضبوط تعاون تے بروقت کارروائی لازمی اے، جبکہ مسلح فوجاں سول انتظامیہ تے نیشنل ڈیزاسٹر مینجمنٹ اتھارٹی (این ڈی ایم اے) نال امدادی، ریسکیو تے بحالی دیاں کارروائیاں وِچ ہر ممکن تعاون لئی ہر ویلے تیار نیں۔ آئی ایس پی آر دے مطابق چیف آف ڈیفنس فورسز (سی ڈی ایف) فیلڈ مارشل سید عاصم منیر نے نیشنل ڈیزاسٹر مینجمنٹ اتھارٹی (این ڈی ایم اے) دے ہیڈکوارٹرز وِچ قائم نیشنل ایمرجنسیز آپریشن سنٹر (این ای او سی) دا دورہ کیتا جِتھے اوہناں نوں جاری مون سون سیزن دے تناظر وِچ ملک بھر وِچ آفتان نال نمٹن دیاں تیاریاں، ممکنہ خطرےآں تے مربوط ردعمل دے نظام تے تفصیلی بریفنگ دتی گئی۔ چیئرمین این ڈی ایم اے نے فیلڈ مارشل نوں نیشنل ایمرجنسیز آپریشن سنٹر دیاں آپریشنل صلاحیتاں، جدید ٹیکنالوجی تے مبنی رسپانس سسٹم تے ’’ڈیزاسٹر لینز 2026‘‘ دے حوالے نال آگاہ کیتا۔ بریفنگ وِچ دَسیا گیا کہ اس نظام دے ذریعے مون سون دی موجودہ صورتحال، وکھ وکھ قدرتی خطرےآں دی مسلسل نگرانی تے بروقت پہلاں توں انتباہی معلومات فراہم کیتیاں جا رہیاں نیں تاں جو کسے وی ممکنہ آفت دی صورت وِچ فوری تے موثر ردعمل یقینی بنایا جا سکے۔ اس موقعے تے فیلڈ مارشل سید عاصم منیر نے این ڈی ایم اے دی قومی سطح تے آفتان نال نمٹن دی استعداد ودھان، جدید ٹیکنالوجی دے استعمال تے مربوط نظام نوں ہور موثر بنان دیاں کوشلاں نوں سراہیا۔ اوہناں نے کہیا کہ انسانی جاناں دے تحفظ تے قومی تنصیبات دی حفاظت لئی سارے متعلقہ اداریاں دے وچالے مضبوط رابطہ، ہم آہنگی تے بروقت فیصلے ڈاڈھے اہم نیں۔ اوہناں نے اس عزم دا اعادہ کیتا کہ مسلح فوجاں ہر قدرتی آفت تے ہنگامی صورتحال وِچ سول انتظامیہ تے این ڈی ایم اے دے موڈھے نال موڈھا جوڑ کے کھڑیاں نیں تے امدادی، ریسکیو تے بحالی دیاں کارروائیاں وِچ ہر ممکن معاونت فراہم کردیاں رہن گیاں۔
