یومِ استحصالِ کشمیر اج، ریلیاں، مظاہرے ہوون گے، تنازع دے منصفانہ حل نال ہی امن ممکن: شہباز شریف
مودی حکومت دے 5 اگست 2019 دے اقداماں خلاف کنٹرول لائن دے دوہاں پاسے احتجاج، سویرے 9 وجے اک منٹ دی خاموشی، غیر آئینی اقدام قبول نہیں، حریت رہنما، ایہہ جہے اقداماں نال تنازع دی قانونی حیثیت بدلے گی تے نہ ہی کشمیری عوام دے عزم نوں متزلزل کیتا جا سکے گا، صدر زرداری، مقبوضہ کشمیر دی حیثیت بحال کیتی جائے، سکھ تنظیماں
سرینگر (اے پی پی) کنٹرول لائن دے دوہاں پاسے، پاکستان تے دنیا بھر وِچ مقیم کشمیری 5 اگست 2019 نوں مودی دی زیرِ قیادت بھارتی حکومت ولوں کیتے گئے غیر قانونی اقداماں دے خلاف اپنا احتجاج ریکارڈ کران لئی اج یومِ استحصالِ کشمیر مناؤن گے، وزیرِ اعظم شہباز شریف نے یومِ استحصال دے موقعے تے کشمیری عوام نال اظہارِ یکجہتی لئی اہم ہدایات جاری کیتیاں نیں، اس حوالے نال جاری نوٹیفکیشن دے مطابق یومِ استحصالِ کشمیر دے موقعے تے ملک بھر وِچ کشمیری عوام نال اظہارِ یکجہتی لئی اج سویرے 9 وجے اک منٹ دی خاموشی اختیار کیتی جائے گی، یاد رہے کہ اس دن مودی حکومت نے اقوامِ متحدہ دیاں قرارداداں تے بین الاقوامی قانون دی سنگین خلاف ورزی کردے ہوئے دفعہ 370 تے 35A نوں منسوخ کر دِتا سی جیہدے تحت غیر قانونی زیرِ تسلط جموں و کشمیر نوں خصوصی حیثیت حاصل سی، کل جماعتی حریت کانفرنس نے کشمیری عوام توں اپیل کیتی اے کہ اوہ اج یومِ استحصالِ کشمیر نوں یومِ سیاہ دے طور تے مناؤن تاں جو دنیا نوں ایہہ واضح پیغام دِتا جا سکے کہ بھارت نے اوہناں دے مادرِ وطن تے غیر قانونی طور تے قبضہ کر رکھیا اے، حریت رہنماواں تے تنظیماں نے سرینگر وِچ جاری اپنے بیانات وِچ کہیا اے کہ کشمیری مودی حکومت دے 5 اگست 2019 دے غیر قانونی تے غیر آئینی اقداماں نوں قبول نہیں کردے تے تنازعِ کشمیر دے حل تک اپنی جدوجہد جاری رکھن گے۔ اوہناں نے عالمی برادری توں اپیل کیتی کہ اوہ اقوامِ متحدہ دے زیرِ انتظام متنازع علاقے وِچ بھارت دے غیر قانونی تے غیر آئینی اقداماں دا نوٹس لوے۔
جموں وِچ سکھ تنظیماں نے وی مقبوضہ جموں و کشمیر دی ریاستی حیثیت دی فوری بحالی دا مطالبہ کیتا اے، ایہہ مطالبہ بھائی کنہیا نشکام سیوا سوسائٹی دے سربراہ مہندر سنگھ دی زیرِ صدارت منعقدہ سکھ رہنماواں دے اجلاس وِچ کیتا گیا، یومِ استحصالِ کشمیر تے اپنے پیغام وِچ صدر آصف علی زرداری نے کہیا اے کہ جنوبی ایشیا وِچ پائیدار تے منصفانہ امن دا قیام تنازعِ جموں و کشمیر دے پرامن حل نال جڑیا ہویا اے، اج اساں یومِ استحصالِ کشمیر تے بھارتی غیر قانونی مقبوضہ جموں و کشمیر دے عوام نال اپنی غیر متزلزل یکجہتی دا اعادہ کردے آں، اوہناں نے کہیا کہ اج بھارت دے 5 اگست 2019 دے ایہناں غیر قانونی تے یکطرفہ اقداماں نوں سات ورھے مکمل ہو چکے نیں، ایہہ اقدام نہ تاں اس تنازع دی قانونی حیثیت نوں تبدیل کر سکدے نیں تے نہ ہی کشمیری عوام دے عزم نوں متزلزل کر سکدے نیں، وزیرِ اعظم شہباز شریف نے اپنے پیغام وِچ کشمیری بھراواں تے بھیناں نال یکجہتی دا اظہار کردے ہوئے کہیا کہ جموں و کشمیر دا تنازع جنوبی ایشیا وِچ امن و استحکام لئی بنیادی تے دیرینہ حل طلب مسئلہ اے، خطے وِچ پائیدار امن طاقت دے استعمال یا یکطرفہ اقداماں نال نہیں بلکہ کشمیری عوام دیاں امنگاں تے اقوامِ متحدہ دی سلامتی کونسل دیاں متعلقہ قرارداداں دے مطابق تنازع دے منصفانہ تے پرامن حل نال ہی ممکن اے، پاکستان کشمیری عوام دی سفارتی، سیاسی تے اخلاقی حمایت جاری رکھے گا، اساں اس دن نوں اس عزم دے نال مناؤندے آں کہ دنیا نوں بھارت دے غیر قانونی تے یکطرفہ اقداماں دی سنگینی دی یاد دہانی کرائی جائے جیہناں دے ذریعے اوہنے غیر قانونی طور تے بھارت دے زیرِ قبضہ جموں و کشمیر دی بین الاقوامی سطح تے تسلیم شدہ متنازع حیثیت نوں تبدیل کرن دی کوشش کیتی، وزیرِ اعظم نے کہیا کہ سات ورھے لنگھ جان دے باوجود ایہہ غیر قانونی اقدام نہ تاں جموں و کشمیر دی قانونی حیثیت تبدیل کر سکے نیں تے نہ ہی کشمیری عوام دے اپنے جائز حقِ خودارادیت دے حصول دے پختہ عزم نوں کمزور کر سکے نیں۔
