علیمہ خان نوں والد دی قبر تے جان توں روک دِتا گیا، کئی کارکن گرفتار

کارکنان نے عمران خان دے حق وِچ نعرے بازی کیتی، پولیس نے قافلے نوں روک لیا، گرفتار کارکنان نوں چھڈ دیو اساں قافلہ موڑ لینے آں: علیمہ خان، پولیس نے رہا کر دِتا

میانوالی (نامہ نگار) بانی پی ٹی آئی عمران خان دی بھین علیمہ خان نے لنگھے دن اچانک میانوالی دا دورہ کیتا۔ اوہناں نے کارکنان دے ہمراہ اپنے والد دی قبر تے حاضری دین دا پروگرام بنایا پر انتظامیہ ولوں روک دِتا گیا۔ مزاحمت تے کئی کارکن گرفتار ہو گئے تے اوہ واپس چلی گئیاں۔ اوہ لنگھے دن ڈیرہ اسماعیل خان توں میانوالی ول روانہ ہوئیاں تاں راستے وِچ تھاں تھاں اوہناں دا پرتپاک استقبال کیتا گیا تے اپنے آبائی ضلع میانوالی پہنچیاں تاں اوتھے وی بہت وڈی تعداد وِچ لوک پہنچ گئے تے علیمہ خان دا والہانہ استقبال کیتا۔ علیمہ خان دی میانوالی پنجاب وِچ انٹری تے کارکنان گرفتار وی ہوئے تے شاہد خٹک تے پولیس دی تلخ کلامی ہوئی۔ علیمہ خان نے خیبر پختونخوا دی آخری حدود نوں چھڈ کے پنجاب دا رخ کیتا، اوہ ڈیرہ اسماعیل خان توں چشمہ روڈ توں میانوالی جہاز چوک پہنچیاں۔ کارکنان نے عمران خان دے حق وِچ نعرے بازی کیتی پھر انڈر پاس دے نیڑے پولیس نے قافلے نوں روک لیا کیونکہ علیمہ خان اپنے آبائی گھر ول جا رہیاں سن۔ شاہد خٹک تے پولیس دے وچالے تلخ کلامی وی ہوئی، پولیس آفیسر کاشف دا کہنا سی تُسی مہربانی کر کے قافلے نوں واپس موڑ لوو اساں چلے جاواں گے، غریب لوکاں لئی مسائل پیدا ہوون گے۔ علیمہ خان نے کہیا گرفتار کارکنان نوں چھڈ دیو اساں قافلہ موڑ لینے آں، علیمہ خان نے جیویں ہی قافلہ واپس موڑیا گرفتار کارکنان نوں رہا کر دِتا گیا۔