کشمیر چوک، فیصل مسجد انڈر پاسز اُتے اگلے مہینے کم شروع: محسن نقوی
اسلام آباد ایکسپریس وے سروس روڈ پروجیکٹ ہرحال وچ مقررہ ویلے وچ پورا کرن دی ہدایت
اسلام آباد (خصوصی رپورٹر) وفاقی وزیر داخلہ محسن نقوی نے آکھیا اے کہ اسلام آباد وچ ٹریفک نوں رواں رکھن تے شہریاں دی سوکھ لئی کشمیر چوک تے فیصل مسجد دے کول دو نویں انڈر پاس بنائے جان گے، جِہناں اُتے اگلے مہینے کم شروع کر دتا جاوے گا۔ وفاقی وزیر داخلہ نے بُدھ نوں سی ڈی اے ہیڈکوارٹرز وچ میٹنگ دی صدارت کیتی، جِس وچ اسلام آباد وچ چل رہے تے اگے شروع ہون آلے ترقیاتی پروجیکٹاں دا جائزہ لیا گیا۔ میٹنگ دوران محسن نقوی نے ایس گل اُتے سخت غصے دا اظہار کیتا کہ وفاقی راجگڑھ وچ ہݨ تک ریسکیو 1122 دا پورا فعال ایمرجنسی رسپانس سسٹم موجود نہیں۔
اوہناں ہدایت کیتی کہ کیپیٹل ایمرجنسی سروسز نوں فوراََ پورا فعال بنان لئی ہنگامی پدھر اُتے قدم چੁੱਕے جان۔ اوہناں ہور ہدایت کیتی کہ قانونی کارروائی پوری کرن مگروں کیپیٹل ایمرجنسی سروسز دے چار نویں مرکزاں دی اساری دا کم چھیتی توں چھیتی شروع کیتا جاوے تاں جو ہنگامی حالت وچ شہریاں نوں ویلے سر مدد مل سکے، میٹنگ وچ سی ڈی اے دی پائیدار کمائی ودھان بابت وکھ وکھ صلاحیتاں دا وی جائزہ لیا گیا۔ وزیر داخلہ نے افسراں نوں ہدایت کیتی کہ ادارے نوں مالی پدھر اُتے آپ توں کفیل بنان لئی لمبے ویلے دا ریونیو ماڈل تیار کیتا جاوے، محسن نقوی نے اسلام آباد ایکسپریس وے سروس روڈ پروجیکٹ ہرحال وچ مقررہ ویلے وچ پورا کرن دی وی ہدایت کیتی۔ میٹنگ وچ اسلام آباد دے وکھ وکھ وڈے ترقیاتی پروجیکٹاں اُتے اگے ودھن تے آندے کماں دے حوالے نال کُھل کے بریفنگ دتی گئی۔
