بلاک چین صرف کرپٹو کرنسی نہیں، امانت دی ڈیجیٹل شکل اے: بلال ثاقب

کراچی سیلانی ویلفیئر انٹرنیشنل ٹرسٹ تے سیلانی سکول آف بزنس اینڈ اسلامک لیڈر شپ دے ہیٹھ چوتھی نیشنل اسلامک اکنامک فورم کانفرنس مقامی ہوٹل وچ کروائی گئی۔

ایس موقعے اُتے اک پکی رِتھ رل کے پاس کیتی گئی جِس وچ آکھیا گیا کہ 16 بینکاں وچوں جِہڑے 5 بینکاں نے اسلامی بینکنگ نوں اپناؤن توں نانہہ کیتی اے اوہناں بینکاں نوں وی 31 دسمبر 2027 تک اسلامی بینکنگ وچ ڈھالیا جاوے تے کوئی چُھٹ نہ دتی جاوے کیونکہ پردیسی بینکاں نوں پاکستان دے قانوناں دی منن کرنی چاہیدا اے۔ وزیر مملکت تے پاکستان ورچوئل ایسٹس ریگولیٹری اتھارٹی دے چیئرمین بلال بن ثاقب نے کانفرنس نال ورچوئل خطاب وچ آکھیا کہ انٹرنیٹ نے دُنیا نوں بدل دتا اے۔

بلاک چین تے مصنوعی ذہانت (AI) صرف نویں ٹیکنالوجی نہیں سگوں ایہہ انسان دی پیداوری طاقت نوں نواں روپ دھر رہی اے۔ ایس ویلے ارباں ڈالراں دی لین دین اے آئی ایجنٹس دے ذریعے ہو رہی اے تے ایہہ ایجنٹس اک دوجے دی پروڈکٹ تے سروسز خرید رہے نیں۔ ایہہ صرف ٹیکنالوجی نہیں، امانت دی ڈیجیٹل شکل اے۔ ایہہ سمجھنا بہت ضروری اے کہ جدوں وی مصنوعی ذہانت نوں ویلیو ایڈ کرنی ہووے گی تاں اوہ فزیکلی جا کے کوئی بینک اکاؤنٹ نہیں کھولے گی، نہ چیک لکھے گی سگوں کرپٹو وچ ٹرانزیکشن کرے گی۔ ایہہ اوہو جہی ٹیکنالوجی اے جو مالکانہ حق نوں بچاؤندی اے، ریکارڑ صاف ستھرا بناندی اے، فراڈ روکدی اے۔ جے پاکستان وچ ہر قسم دی خیرات تے زکوٰۃ دا پیسہ ڈیجیٹل ہو جاوے تاں صفائی تے سچائی ودھ جاوے گی۔