رواں سال ایل این جی دا ٹیرف سو فی صد ودھ گیا، چوتھی واری اضافہ

نویں گھریلو کنکشنز دا ٹیرف 7 ہزار 181 روپے 94 پیسے فی ایم ایم بی ٹی یو مقرر

لاہور (اپنے کامرس رپورٹر توں): عالمی مارکیٹ وچ مہنگی ہون والی ایل این جی وی بوجھ بن گئی، رواں سال ایل این جی صارفین دا ٹیرف چوتھی واری ودھا دتا گیا، ٹیرف وچ سو فی صد توں وی ودھ اضافہ کرکے کمرشل تے ڈومیسٹک صارف دے ٹیرف دا فرق وی مکا دتا گیا۔ ذرائع دے مطابق پہلاں گھریلو ایل این جی ٹیرف کمرشل صارف توں گھٹ سی، نویں لگائے جان والے گھریلو ایل این جی کنکشنز دا ٹیرف 7 ہزار 181 روپے 94 پیسے فی ایم ایم بی ٹی یو مقرر کر دتا گیا اے۔ جنوری 2026 وچ گھریلو آر ایل این جی ٹیرف 3 ہزار 155 روپے فی ایم ایم بی ٹی یو سی، چھی مہینیاں دے دوران ایل این جی گھریلو صارفین دے ریٹ وچ 4 ہزار 26 روپے فی ایم ایم بی ٹی یو دا اضافہ ہویا اے۔ نویں ایل این جی کنکشنز دا نویں ٹیرف دے حساب نال گھٹ توں گھٹ بل 7 ہزار تیکر آئے گا۔ جنوری وچ پاکستان عالمی مارکیٹ توں 8 ڈالر فی ایم ایم بی ٹی یو ایل این جی حاصل کر رہیا سی، اونویں ہن آخری شپمنٹ 21 ڈالر فی ایم ایم بی ٹی یو دے حساب نال ملے گی۔