دہشتگردی دے خلاف پاک امریکہ تعاون ہور مضبوط بنان اتے اتفاق

واشنگٹن وچ انسدادِ دہشت گردی گل بات دا چوتھا دور، سکیورٹی، سرحدی سلامتی تے ہور امور اتے صلاح مشورہ، شدت پسند نیٹ ورکس دا مکانا، خطے وچ امن تے استحکام لئی رل کے کوششاں جاری رکھن دے عزم دا اعادہ

واشنگٹن، اسلام آباد امریکہ تے پاکستان دے وچکار انسدادِ دہشت گردی مذاکرات دا چوتھا دور واشنگٹن وچ ہویا، جیدے وچ دہشت گردی دے خلاف پاک امریکہ تعاون ہور مضبوط بنان اتے اتفاق کیتا گیا۔ دفتر خارجہ دے مطابق امریکی وفد دی اگوائی انسدادِ دہشت گردی لئی امریکی کوآرڈی نیٹر گریگوری لوگرفو نے جدوں کہ پاکستانی وفد دی اگوائی وزارتِ خارجہ دے سپیشل سیکرٹری نبیل منیر نے کیتی۔

مذاکرات وچ پاکستان تے امریکہ دے وچکار انسدادِ دہشت گردی دے شعبے وچ شراکت داری نال جُڑے سانجھے مفاداں تے دہشت گردی دا مقابلہ کرن دے دونویں دیساں دے عزم دا اعادہ کیتا گیا۔ وفود نے موجودہ دہشت گردی دے خطرات دی صورتحال اتے وچار وٹرا کیتا، آپسی تعاون نوں ہور اثر دار بنان دے موقیاں دا جائزہ لتا، سرحدی سلامتی نوں مضبوط بنان دے نال نال دہشت گردآں دی مدد تے سہولتکاری دے نیٹ ورکس نوں مکاون دے کماں اتے وی گل بات کیتی۔

دھراں نے ایس سانجھے عزم دا اظہار کیتا کہ اوہ اینہاں دہشت گرد تنظیماں دا بھرپور مقابلہ کرن گے جیہੜیاں دونویں دیساں دے شہریاں دی سلامتی تے خطے دے استحکام لئی خطرہ نیں، جیدے وچ داعش خراسان، القاعدہ، تحریکِ طالبان پاکستان، بلوچستان لبریشن آرمی تے نال جُڑے گروہ شامل نیں۔ دونویں حکومتاں نے ایس گل دا وی اعادہ کیتا کہ اوہ دونویں دیساں نوں محفوظ تے امن آلا بنان لئی انسدادِ دہشت گردی دے شعبے وچ آپسی تعاون نوں ہور مضبوط بنائیاں گے جیہੜा خطے وچ سدا بہار امن، خوشحالی تے استحکام دے سانجھے ویژن دا حصہ وی اے۔

دفتر خارجہ دے اعلامیے وچ آکھیا گیا کہ دونویں دیساں نے موجودہ سکیورٹی خطرات، آپسی تعاون ودھان دے موقیاں، سرحدی سلامتی نوں مضبوط بنان تے شدت پسنداں دے مددگار نیٹ ورکس نوں ختم کرن دے کماں اتے صلاح مشورہ کیتا۔ پاکستان تے امریکہ نے خطے وچ امن، خوشحالی لئی انسدادِ دہشت گردی تعاون جاری رکھن دے عزم دا اظہار کیتا، شدت پسند نیٹ ورکس دے خاتمے، خطے وچ امن تے استحکام لئی سانجھیاں کوششاں جاری رکھن دے عزم دا اعادہ وی کیتا گیا۔