پٹرولیم لیوی دے خلاف جمعہ نوں فیصلہ کن احتجاج ہووے گا: حافظ نعیم
7 اگست نوں سڑکاں بند کرکے حکمراناں نوں عوام نوں ریلیف دین اتے مجبور کیتا جائیگا، کشمیری عوام آزادی دی جدوجہد وچ ضرور کامیاب ہون گے: یومِ استحصال اتے پیغام
لاہور، اسلام آباد (سٹاف رپورٹر، اپنے رپورٹر توں): امیر جماعت اسلامی حافظ نعیم الرحمٰن نے آکھیا اے کہ پٹرولیم لیوی بھتے دے خلاف 7 اگست دا ملک گیر احتجاج فیصلہ کن عوامی طاقت دا مظاہرہ ثابت ہووے گا۔ لکھاں شہری گھراں توں باہر نکلن گے، اہم سڑکاں اتے دھرنے دتے جان گے تے ضلعیاں نوں ملان والیاں سڑکاں بند کرکے حکمراناں نوں عوام نوں ریلیف دین اتے مجبور کیتا جائیگا۔ منصورہ توں جاری بیان وچ انہوں نے آکھیا کہ احتجاجی تحریک دیاں تیاریاں آخری مرحلے وچ نیں، ایہ احتجاج کسے سیاسی مفاد لئی نہیں بلکہ مہنگائی، بے روزگاری تے ناپربداشت ٹیکساں دے بوجھ تھلے دبے ہر پاکستانی دے حقاں دی جنگ اے۔
6 اگست نوں لاہور دی وحدت روڈ اتے جماعت اسلامی حلقہ خواتین ولوں پٹرولیم لیوی دے خلاف احتجاجی مظاہرے نوں خطاب کراں گا، جتھے عورتاں وی عوام دشمن پالیسیاں دے خلاف بھرپور آواز بلند کرن گیاں۔ انہوں نے نوجواناں نوں خاص اپیل کیتی کہ اوہ 7 اگست نوں موٹر سائیکلاں اتے باہر نکلن، سڑکاں اتے لیا کے پرامن انداز وچ سڑکاں بند کرن تے احتجاج نوں کامیاب بنائن۔ انہوں نے حکومت نوں خبردار کیتا کہ احتجاج وچ روکاٹاں پان توں پاسہ کیتا جائے تے منگ کیتی کہ پٹرولیم لیوی فوری ختم کیتی جائے، آئی پی پیز دے مہنگے معاہدیاں اتے نظرثانی کیتی جائے، لوڈشیڈنگ دا خاتمہ کیتا جائے تے مہنگائی اتے قابو پان لئی فوری اثر دار قدم چُکے جان۔
حافظ نعیم الرحمٰن نے یومِ استحصالِ کشمیر اتے اپنے خاص پیغام وچ آکھیا اے کہ بھارت ولوں 5 اگست 2019 نوں مقبوضہ جموں و کشمیر دی خاص آئینی حیثیت ختم کرن دے غیر قانونی تے یکطرفہ کماں نوں آج سات برس ہو چکے نیں پر ایہ کم نہ تاں تنازع کشمیر دی حیثیت بدل سکے تے نہ ہی کشمیری عوام دے جذبے آزادی نوں کمزور کر سکے۔ کشمیر پاکستان دی شہ رگ اے تے پاکستانیاں دے دل کشمیری بھراواں نال دھڑکن دے نیں۔ اوہ دن دور نہیں جدوں کشمیری عوام دی لمے چر دی جدوجہد آزادی ضرور کامیابی نال ہمکنار ہووے گی، کشمیری اپنے مستقبل دا فیصلہ آپ کرن گے تے الحاق پاکستان دے خواب نوں حقیقت دا روپ دین وچ کامیاب ہون گے۔
