صدر ولوں ججز دی تقرری دی منظوری نہ ہو سکی اسلام آباد ہائیکورٹ وچ اَج سنوائی
جوڈیشل کمیشن نے 19 ججز دی تعیناتی، 5 نوں پکا کرن دی سفارش کیتی، منظوری نہ ہون اتے نویں ججز دی حلف برداری ملتوی، پکا کرن دی سفارش پان والیاں وچوں 1 دی معیاد مک گئی، پشاور ہائیکورٹ دے 4 جج وی کم جاری نہیں رکھ سکن گے
اسلام آباد (اپنے نامہ نگار توں، مانیٹرنگ ڈیسک): اسلام آباد ہائیکورٹ سمیت دیس دیاں وکھ وکھ ہائیکورٹس وچ ججز دی تقرری دی سمری صدر ولوں منظور نہ کرن دا رولا ودھ گیا اے۔ صدرِ مملکت ولوں ججز دی تعیناتی دی سمری منظور نہ کرن دے خلاف اسلام آباد ہائیکورٹ وچ عرضی سنوائی لئی لا دتی گئی اے، جسٹس ارباب طاہر اَج عرضی اتے سنوائی کرن گے۔ ایڈووکیٹ لقمان ظفر نے زاہد آصف چودھری ایڈووکیٹ مارفَت عرضی دائر کیتی جیدے وچ صدرِ مملکت تے وزیراعظم نوں بنام سیکرٹری، وزارت قانون و انصاف تے سیکرٹری جوڈیشل کمیشن آف پاکستان نوں فریق بنایا گیا اے تے مؤقف دتا گیا اے کہ 20 تے 21 جولائی نوں جوڈیشل کمیشن آف پاکستان نے وکھ وکھ ہائیکورٹس وچ ججز دی تعیناتی دی سفارش کیتی سی، جوڈیشل کمیشن نے 19 ججز دی تعیناتی تے پنج ججز نوں پکا کرن دی سفارش کیتی سی۔
عرضی گزار دے مطابق نویں تجویز کیتے گئے ججز دی حلف برداری دی تقریب 27 جولائی نوں ہونی سی، پر صدرِ مملکت نے نہ تاں سمری منظور کیتی تے نہ ہی واپس کیتی، سگوں مبینہ طور اتے کِسّے قانونی جواز توں بغیر اپنے کول روکی رکھی، جیدے کرکے تقریب کِسّے پکے ویلے توں بغیر ملتوی کر دتی گئی۔ عرضی وچ آکھیا گیا اے کہ صدرِ مملکت نے آئین دے آرٹیکل 48 دے تحت سمری منظور کرنی ہوندی اے، آئین وچ سمری دی منظوری لئی صدرِ مملکت کول 15 دن دا ویلہ مقرر اے، مقرر ویلے توں ودھ سمری نوں روکی رکھنا غیر قانونی تے غیر آئینی اے۔ عرضی وچ استدعا کیتی گئی اے کہ عدالت سمری دی ہݨوکی حالت، صدرِ مملکت دے دفتر وچ اوہدے پُڄن دی تریخ منگوائے، سمری وچ جے لیٹ ہوئی اے تاں اوہدیاں وجوہات منگیاں جان، صدر نوں اوہناں دے سیکرٹری مارفَت ججز تقرری دی سمری منظور کرن دا حکم دتا جائے۔
صدارتی منظوری وچ ہیر پھیر نے وڈی عدلیہ دے کماں نوں وی متاثر کرنا شروع کر دتا اے۔ سندھ ہائیکورٹ دے اک ایڈیشنل جج دی نوکری دی معیاد پہلاں ہی مک چکی اے، جدوں کہ پشاور ہائیکورٹ دے چار ایڈیشنل جج وی آندے کجھ دناں وچ ایسّے حال دا شکار ہون والے نیں، بھانویں جوڈیشل کمیشن اوہناں دیاں خدمتاں جاری رکھن دی سفارش کر چکیا اے۔
