مکمل سفری دستاویزاں والیاں نوں نہیں روکیا جائے گا: محسن نقوی

جعلسازاں دے خلاف شکنجہ سخت، جدید ٹیکنالوجی نال امیگریشن وچ آسانی پیدا ہوئی، نامکمل دستاویزاں تے کسی نوں سفر دی اجازت ہرگز نہ دتی جائے: لاہور ایئرپورٹ دا دورہ

لاہور وفاقی وزیرِ داخلہ محسن نقوی نے علامہ اقبال انٹرنیشنل ایئرپورٹ لاہور دا اچانک دورہ کیتا تے ایئرپورٹ تے مسافراں دے امیگریشن پراسیس دا جائزہ لیا۔ اوہناں نے ایس موقعے تے ایف آئی اے حکام نوں ہدایت کیتی کہ نامکمل سفری دستاویزاں تے کسی نوں سفر دی اجازت ہرگز نہ دتی جائے، جعلی دستاویزاں تے سفر کرن والیاں دے خلاف شکنجہ سخت کر دتا گیا اے، مکمل سفری دستاویزاں والے کسی مسافر نوں سفر توں نہیں روکیا جائے گا۔ وزیرِ داخلہ نے امیگریشن کاؤنٹراں دا معائنہ کیتا تے عملے توں پراسیس بارے پوچھا۔ اوہناں نے مسافراں توں بھی امیگریشن پراسیس دے وقت بارے دریافت کیتا، مسافراں نے کہیا کہ امیگریشن وچ 30 منٹ لگے۔ امیگریشن لئی انتظامات مزید بہتر کیتے جان، اوہناں نے فوری طور تے امیگریشن پراسیس نوں تیز کرن لئی ایئرپورٹ تے تمام کاؤنٹر اوپن رکھن دے احکامات جاری کیتے۔ اوہناں نے کہیا کہ جدید ٹیکنالوجی نال امیگریشن وچ آسانی ہوئی اے، دوجے کاؤنٹر اوپن ہوݨ نال امیگریشن وچ تاخیر نہیں ہووے گی تے مسافراں نوں سہولت ملے گی۔ ایک مسافر دی ایجنٹ دی طرفوں رقم لین دی شکایت تے وزیرِ داخلہ محسن نقوی نے موقعے تے ہی نوٹس لیندے ہوئے کیس ڈائریکٹر ایف آئی اے دے سپرد کر دتا تے ایجنٹ دی گرفتاری دا حکم دتا۔