پی ایم اے پنجاب دا پی او ایس نظام دے خلاف تحریک چلان دا اعلان
چھاپے بند، نجی ہسپتالاں، لیبارٹریاں نوں پی او ایس نظام توں مستثنیٰ قرار دتا جائے، احتجاج لئی مرکزی تنظیم آئندہ دا لائحہ عمل طے کرے گی: رہنماواں دی پریس کانفرنس
اسلام آباد (اپنے رپورٹر توں) پاکستان میڈیکل ایسوسی ایشن پنجاب نے ایف بی آر دی طرفوں نجی کلینکاں، لیبارٹریاں، ڈائیگناسٹک سینٹراں تے ہسپتالاں وچ پی او ایس / الیکٹرانک انوائسنگ نظام دے نفاذ نوں مسترد کردے ہوئے ملک گیر احتجاجی تحریک چلان دا اعلان کر دتا۔ اتوار نوں نیشنل پریس کلب اسلام آباد وچ پریس کانفرنس نال خطاب کردے ہوئے پی ایم اے پنجاب دے صدر ڈاکٹر کامران سعید، سیکرٹری ڈاکٹر کامران احمد، ڈاکٹر ظفر، ڈاکٹر عمران تے دوجے رہنماواں نے کہیا کہ ایف بی آر دی طرفوں کلینکاں وچ پی او ایس نظام دی تنصیب ناقابلِ قبول اے۔ ایس دے نفاذ دے خلاف خدمات دی فراہمی معطل کر کے احتجاجی تحریک چلائی جائے گی۔ اوہناں نے کہیا کہ POS نظام چلان لئی ہر کلینک وچ اضافی عملہ مقرر کرنا پئے گا جس لئی الگ جگہ، انٹرنیٹ، بجلی تے دوجیاں سہولتاں درکار ہوݨ گیاں۔ پی ایم اے پنجاب دے رہنماواں نے مطالبہ کیتا کہ نجی کلینکاں، لیبارٹریاں، ڈائیگناسٹک سینٹراں تے ہسپتالاں نوں لازمی POS/e-invoicing نظام توں مستثنیٰ قرار دتا جائے تے ایف بی آر دی طرفوں ہسپتالاں تے کلینکاں تے چھاپیاں دا سلسلہ بند کیتا جائے۔ رہنماواں نے اعلان کیتا کہ تمام صوبائی تے وفاقی باڈیز دے اجلاساں توں بعد مرکزی پاکستان میڈیکل ایسوسی ایشن ایس احتجاج نوں ملک بھر وچ پھیلان لئی آئندہ دا لائحہ عمل طے کرے گی۔
