3 ممالک دا اتحاد “اسلامی نیٹو” دا آغاز اے: رانا تنویر
جلد دوجے اسلامی ملک وی شامل ہوݨ گے، خطے وچ امن دا باعث بنے گا: وفاقی وزیر؛ الٹی گنتی والے اپنے ارادیاں دی ناکامی تے ہن سیدھی گنتی شروع کرن گے: گفتگو
کالا شاہ کاکو (نامہ نگار) وفاقی وزیر برائے قومی غذائی تحفظ و تحقیق رانا تنویر حسین نے کہیا اے کہ 3 وڈے اسلامی ملکاں دا اتحاد “اسلامی نیٹو” دا آغاز اے جس وچ جلد دوجے اسلامی ملک وی شامل ہو جاݨ گے تے ایہ اتحاد نہ صرف خطے وچ امن دا باعث بنے گا بلکہ دنیا وچ مساوات دے فروغ دا باعث بھی ہووے گا۔ انہاں خیالات دا اظہار اوہناں نے پیپلز پارٹی دے سابق رکن پنجاب اسمبلی چودھری بشیر احمد گجر دے نواسے دے انتقال تے اظہارِ تعزیت توں بعد میڈیا نال گفتگو کردے ہوئے کیتا۔
حکومت جاݨ دے حوالے نال سوال تے رانا تنویر حسین نے کہیا کہ الٹی گنتی والے اپنے ارادیاں دی ناکامی تے ہن سیدھی گنتی شروع کر دیݨ گے، ساڈی حکومت نہ صرف آئینی مدت پوری کرے گی بلکہ ڈلیور بھی کرے گی تے ملک محرومیاں توں نکل کے خوشحالی ول ودھے گا۔ رانا تنویر حسین نے کہیا کہ مکہ سمجھوتہ اسلامی تاریخ دی بہت وڈی پیشرفت اے تے ایہ اسلامی اتحاد دی نویں صف بندی دا ذریعہ اے۔ بہت جلد مزید اسلامی ملک شامل ہوݨ گے تے دنیا طاقت دے توازن نال اگے ودھے گی۔ کچھ اسلامی ملکاں دی طرفوں سمجھوتے تے اعتراض دے سوال تے رانا تنویر حسین نے کہیا کہ جَد اوہناں ملکاں نوں معاہدے دی حقیقت دا علم ہووے گا تاں وقت دے نال دوجے اسلامی ملکاں دی سوچ وی درست ہو جائے گی۔
افغانستان دے حوالے نال وفاقی وزیر دا کہنا سی کہ افغان حکومت خود اندرونی خلفشار دا شکار اے جو دوجے ملکاں دے امن دا خیال نہیں رکھ سکدی۔ اوہناں نے کہیا کہ جے افغان حکومت نے دہشت گردی وچ ملوث گروپاں دی حمایت ترک نہ کیتی تاں وہ اپنے ملک دی تباہی دے خود سب توں وڈے دشمن ہوݨ گے۔
