بلوچستان: سکیورٹی فورسز دیاں کارروائیاں، 15 خوارج ہلاک

فورسز نے مستونگ، بولان، واشک، آواران تے ٻئے علاقیاں وچ آپریشن کیتے، وݙی مقدار وچ اسلحہ تے گولہ بارود وی برآمد، بلوچستان توں دہشتگردیں دا مکمل خاتمہ کریسوں: محسن نقوی، لکی مروت وچ پولیس سکواڈ تے فائرنگ، 1 اہلکار شہید، ݙوجھا زخمی

اسلام آباد، سرائے نورنگ (اے پی پی، آن لائن) بلوچستان وچ سکیورٹی فورسز دے آپریشن “ردالفتنہ 3” دے تحت دہشتگردیں دے خلاف کارروائیاں جاری، 15 خوارج ہلاک، ݙوجھے پاسے پختونخوا وچ نامعلوم دہشتگردیں فائرنگ کر کے ہک پولیس اہلکار شہید، ݙوجھا زخمی کر ݙتا۔ تفصیلاں دے مطابق بلوچستان وچ سکیورٹی فورسز نے مستونگ، بولان، واشک، آواران، سبی، خضدار، ہرنائی تے نوشکی وچ خوارج دے خلاف خفیہ معلومات دی بنیاد تے ٻہوں ساریاں کارروائیاں کیتیاں جیندے نتیجے وچ 15 خوارج ہلاک تھی گئے، انہاں دے قبضے توں وݙی مقدار وچ اسلحہ تے گولہ بارود وی برآمد کر گھدا گیا۔ انہاں کارروائیاں دی وجہ توں خوارج دے نیٹ ورک نوں وݙਾ نقصان پُڄیا تے انہاں دی نقل و حرکت محدود کر ݙتی گئی۔

دریں اثناء وفاقی وزیر داخلہ محسن نقوی نے آپریشن “ردالفتنہ 3” دے تحت بلوچستان وچ کامیاب آپریشنز تے سکیورٹی فورسز نوں خراج تحسین پیش کریندے ہوئیں آکھیا جو سکیورٹی فورسز نے فتنہ الہندوستان تے فتنہ الخوارج دے مذموم عزائم نوں ناکام بݨا ݙتا، دہشتگردی دے خلاف برسرپیکار سکیورٹی فورسز دے بہادر جوان قوم دا فخر نیں۔ قوم دی حمایت نال بلوچستان توں دہشتگردیں دا مکمل خاتمہ کیتا ویسی۔

اڄوکے واقعے وچ پختونخوا دے ضلع لکی مروت وچ پولیس دا ݙو رکنی رائڈر سکواڈ اولڈ پولیس لائنز سعید خیل قبرستان دے قریب گشت کریندا پیا ہئی جو نامعلوم دہشتگردیں انہاں تے فائرنگ کر ݙتی، جیندے نتیجے وچ کانسٹیبل ساجداللہ شہید تے کانسٹیبل محمد وقاص زخمی تھی گئے۔ واقعے دے بعد حملہ آور فرار تھی گئے جد کہ اطلاع ملݨ تے سکیورٹی فورسز جائے وقوعہ تے پُڄ کے لاش تے زخمی اہلکار نوں ہسپتال منتقل کر ݙتا، پولیس علاقے نوں گھیرے وچ گھن کے وسیع پیمانے تے سرچ آپریشن شروع کر ݙتے۔