آزاد کشمیر انتخابات دا تریجھا مرحلہ اڄ، پونچھ ڈویژن دے 4 حلقیاں وچ پولنگ تھیسی
آزاد کشمیر انتخابات: پونچھ ڈویژن دے 4 حلقیاں وچ اڄ پولنگ، 4 لکھ 60 ہزار توں زائد ووٹرز حق رائے دہی استعمال کریسن، 82 امیدوار مدمقابل، سکیورٹی عملہ تے پولنگ میٹریل پڄ گیا، آؤݨ آلے ست ݙینھ وچ راولاکوٹ تے سدھنوتی وچ الیکشن دی تاریخ دا اعلان متوقع
مظفرآباد آزاد جموں و کشمیر قانون اسمبلی دے انتخابات دا تریجھا مرحلہ اڄ تھیسی، باغ دے تریہہ تے حویلی دے ہک انتخابی حلقے وچ پولنگ تھیسی، پونچھ ڈویژن دے 2 ضلعیاں دے انہاں 4 انتخابی حلقیاں وچ 4 لکھ 60 ہزار توں زائد ووٹرز حق رائے دہی استعمال کریسن، مجموعی طور تے 82 امیدوار میدان وچ نیں، انہاں حلقیاں وچ ایل اے 14 غربی باغ وچ مسلم کانفرنس دے سردار عتیق احمد، عوامی دست وبازو دے ساجد اقبال عباسی، پیپلز پارٹی دے راجہ مبشر اعجاز، آئی پی پی دے فہیم فاروق تے ن لیگ دے راجہ فیصل آزاد، ایل اے 15 وسطی باغ وچ ن لیگ دے راجہ مشتاق منہاس، پیپلز پارٹی دے سردار ضیا القمر، آئی پی پی دے سردار تنویر الیاس تے جماعت اسلامی دے بریگیڈیئر محمد خان، ایل اے 16 شرقی باغ وچ ن لیگ دے سردار میراکبر، پیپلز پارٹی دے سردار قمرالزمان جد کہ ایل اے 17 حویلی وچ وزیراعظم آزاد جموں و کشمیر فیصل ممتاز راٹھور، آزاد امیدوار سابق ممبر کشمیر کونسل خواجہ طارق سعید تے مسلم لیگ (ن) دے محسن عزیز مدمقابل نیں۔
یاد رہے کہ ترجمان الیکشن کمیشن آزاد جموں و کشمیر دے مطابق ضلع باغ تے حویلی وچ انتخابی مہم پچھلی رات 12 بجے ختم تھی چکی اے، انتخابی مہم دے مقررہ وقت دے اختتام دے بعد ہر قسم دی انتخابی سرگرمی تے پابندی اے۔ آزاد جموں و کشمیر دے چیف الیکشن کمشنر جسٹس (ر) غلام مصطفیٰ مغل آکھیا اے جو سکیورٹی وجوہات دی وجہ توں باغ تے حویلی دی چار نشستاں تے پہلے انتخابی عمل مکمل کرݨ دا فیصلہ کیتا گیا، اگلے ست روز وچ راولاکوٹ تے سدھنوتی کیتے انتخابی تاریخ دا اعلان کیتا ون٘دا سڳدا اے، پر امیدواراں نوں انتخابی مہم کیتے مناسب وقت ݙیوݨا ہوسی۔ باغ تے حویلی وچ اڄ تھیوݨ آلی پولنگ نہ صرف انہاں حلقیاں دے امیدواراں دے سیاسی مستقبل دا فیصلہ کریسی بلکہ آزاد کشمیر دی مجموعی سیاسی صورتحال تے حکومت سازی دے آؤݨ آلے مرحلے تے وی ایندے براہ راست اثرات مرتب تھیسن۔ 45 رکنی ایوان وچ حکومت سازی کیتے درکار عددی اکثریت دے تناظر وچ تریجھے مرحلے دے نتائج تے سیاسی جماعتاں دی نظراں مرکوز نیں۔ ابتدائی ݙو مرحلیاں وچ مسلم لیگ (ن) دی برتری دے باوجود آخری مرحلے دے نتائج نوں فیصلہ کن قرار ݙتا ویندا پیا اے، پر تریجھے مرحلے دے نتائج دے بعد نویں حکومت دی تشکیل کیتے سیاسی جماعتاں دی سرگرمیاں مزید تیز تھیسن۔
