اقلیتاں معاشرے دا حسن، عزت تے تحفظ تے سمجھوتا نہیں ہووے گا: مریم نواز
پنجاب دے تاریخی گوردوارے، چرچز، تے مندراں دی تعمیر تے بحالی ترجیحاں وِچ شامل: پیغام وزیراعلیٰ دا کوٹ ادو حادثے وِچ ہلاکتاں تے اظہارِ افسوس، پنجگور وِچ کامیاب کارروائی تے فورسز نوں خراجِ تحسین
لاہور (مانیٹرنگ ڈیسک) وزیراعلیٰ پنجاب مریم نواز شریف نے کہیا اے کہ قائدِ اعظمؒ دا پاکستان سبھ دا وطن، اقلیتاں پاکستانی معاشرے دا حسن تے سر دا تاج نیں، اوہ ایتھے اپنے اپنے عقیدے دے نال محفوظ تے آزاد نیں، اوہناں دی عزت و ناموس، تحفظ تے ترقی تے کبھی سمجھوتا نہیں ہووے گا، پنجاب حکومت اقلیتاں نوں تعلیم و ترقی تے فلاح و بہبود دا پورا حق دین دی پالیسی تے عمل پیرا اے، پنجاب دے تاریخی گوردواریاں، چرچز تے مندراں دی تعمیر تے بحالی ترجیحاں وِچ شامل اے۔ انھاں خیالات دا اظہار اوہناں نے پچھلے روز اقلیتاں دے قومی دن تے جاری اپنے پیغام وِچ کیتا۔ وزیراعلیٰ پنجاب نے اقلیتاں دی آزادی تے حقوق لئی قائدِ اعظمؒ دے افکار تے عمل پیرا ہون دے عزم دا اعادہ کردے ہوئے وطنِ عزیز دی ترقی و خوشحالی لئی سرگرم تمام اقلیتی بھین بھراواں نوں خراجِ تحسین وی پیش کیتا۔ مریم نواز شریف نے مزید کہیا کہ تاریخ وِچ پہلی وار پنجاب نوں اقلیتی برادری لئی مینارٹی کارڈ متعارف کران دا اعزاز حاصل ہویا، مینارٹی کارڈز دے ذریعے سہ ماہی ساڑھے 10 ہزار روپے دتے جا رہے نیں، پنجاب نوں ہی پہلا سکھ میرج ایکٹ 2024 منظور کرن دا اعزاز حاصل اے، آنند کارج نوں قانونی حیثیت حاصل ہو چکی، زیرِ التوا ہندو میرج ایکٹ 2017 دی منظوری دتی گئی۔
اوہناں نے کہیا کہ پنجاب وِچ اقلیتی برادری لئی تعلیم، صحت، روزگار تک باآسانی رسائی ممکن بنا رہے آں، رواں مالی سال اقلیتی برادری لئی ترقیاتی، غیر ترقیاتی بجٹ تے مذہبی تہواراں لئی گرانٹ وِچ خاطر خواہ وادھا کیتا گیا، اقلیتی طلبہ لئی سکالرشپ تے یوحنا آباد وِچ لائیو کورسز شروع کیتے۔ مریم نواز نے کہیا کہ پنجاب وِچ بیساکھی، ہولی، دیوالی، کرسمس تے ایسٹر ہن سرکاری سطح تے بھرپور طریقے نال منائے جاندے نیں، صوبے وِچ اقلیتی کوٹہ سسٹم تے من و عن عمل کیتا جا رہا اے، اقلیتاں دے حقوق دے نہ صرف محافظ آں بلکہ ہر میدان وِچ جائز حصہ دین لئی پرعزم آں، پنجاب وِچ تیزی نال ایہوجہے معاشرے ول ودھ رہے آں جِتھے محبت و رواداری پہچان بنے گی، اقلیتاں پاکستان دے دلکش رنگ نیں، انھاں رنگاں نوں کبھی ماند نہیں پین دیواں گے۔
دریں اثنا وزیراعلیٰ پنجاب نے کوٹ ادو وِچ موٹر سائیکل رکشہ نہر وِچ ڈگن نال قیمتی انسانی جاناں دے ضیاع تے گہرے دکھ تے افسوس دا اظہار کیتا اے، اپنے تعزیتی بیان وِچ اوہناں نے سوگوار خاندان نال اظہارِ ہمدردی تے تعزیت کیتی۔ وزیراعلیٰ نے نہر وِچ ڈوبن والے ہور بندیاں دی تلاش لئی تمام تر میسر وسائل بروئے کار لیاون دا حکم وی دتا۔ علاوہ ازیں مریم نواز شریف نے بلوچستان دے ضلع پنجگور وِچ 5 دہشت گرد ہلاک کرن تے سکیورٹی فورسز نوں خراجِ تحسین پیش کیتا اے، اوہناں نے فورسز دی کامیاب کارروائی تے اظہارِ تشکر کیتا۔
