پاکستان بیلاروس دا تجارت تے صنعت وِچ تعاون ودھاون تے اتفاق
اسلام آباد (الماس حیدر نقوی) پاکستان تے بیلاروس نے تجارت، صنعت، زراعت، سائنس و ٹیکنالوجی، افرادی قوت تے میڈیا سمیت مختلف شعبیاں وِچ تعاون ودھاون تے اتفاق کیتا اے۔ 9ویں مشترکہ وزارتی کمیشن دے اجلاس دے اختتام تے اہم پروٹوکولز تے مفاہمتی یادداشت تے دستخط کیتے گئے۔
پاکستان-بیلاروس مشترکہ وزارتی کمیشن برائے تجارت و اقتصادی تعاون دا 9واں اجلاس 11 تے 12 اگست نوں اسلام آباد وِچ ہویا جیہدی مشترکہ صدارت وفاقی وزیرِ تجارت جام کمال خان تے بیلاروس دے وزیرِ توانائی ڈیانیس ماروز نے کیتی۔ جام کمال خان نے آکھیا کہ دونوں مُلکاں دے تعلقات باہمی اعتماد، خودمختاری تے مشترکہ مفاداں تے استوار نیں۔ مشترکہ وزارتی کمیشن مختلف شعبیاں وِچ شراکت داری ودھاون دا مؤثر پلیٹ فارم اے، جد کہ بدلتے عالمی حالات وِچ نویاں منڈیاں تے عملی تعاون دے مواقع لبھن دی ضرورت اے۔ اجلاس وِچ تجارت دے نویں مواقع لبھن تے مسئلیاں دے حل لئی مشترکہ ورکنگ گروپ دے قیام نوں سراہیا گیا، جد کہ خدمات دے شعبے وِچ تجارتی معاہدے دے امکانات دا جائزہ لین لئی فزیبلٹی سٹڈی گروپ بنان تے اتفاق ہویا۔ صنعتی تعاون خصوصاً چھوٹے تے درمیانے درجے دے کاروباری ادارےآں (ایس ایم ایز) دے درمیان روابط ودھاون تے وی زور دتا گیا۔ پاکستان نے باقاعدہ طریقہ کار تحت پاکستانی افرادی قوت بیلاروس گھلن وِچ سہولت فراہم کرن دے عزم دا اظہار کیتا۔
زراعت وِچ سمندری خوراک، پھلاں، سبزیاں، بیجاں تے ڈیری مصنوعات دے شعبیاں وِچ کاروباری روابط ودھاون تے اتفاق کیتا گیا۔ سائنس و ٹیکنالوجی دے شعبے وِچ معیار، ٹیسٹنگ تے مطابقت جانچن دے طریقہ کار نوں باہمی طور تے تسلیم کرن دے معاہدے دی تیاری تے کم شروع کرن دی تجویز دتی گئی۔ پانی دے تحفّظ، ٹھوس فضلے تے گندے پانی دی صفائی دیاں ٹیکنالوجیاں وِچ تعاون دے امکانات وی زیرِ غور آئے۔ اجلاس دے اختتام تے دونوں مُلکاں نے متفقہ پروٹوکول تے دستخط کیتے۔ بیلاروس دی نیشنل سٹیٹ ٹیلی ویژن اینڈ ریڈیو کمپنی تے پاکستان ٹیلی ویژن کارپوریشن (پی ٹی وی) دے درمیان نشریاتی تعاون، مواد دے تبادلے تے پیشہ ورانہ روابط لئی مفاہمتی یادداشت وی طے پا گئی۔
بیلاروس دے وزیرِ توانائی دزیانس ماروز نے خطاب کردیاں آکھیا کہ مشترکہ وزارتی کمیشن دونوں مُلکاں دے اعلیٰ سطحی روابط نوں مزید اگے ودھاون لئی اہم بنیاد فراہم کرے گا۔ پاکستان تے بیلاروس دی قیادت دے درمیان روابط انتہائی دوستانہ تے اعلیٰ سطح تے قائم نیں۔ دونوں مُلکاں دے درمیان اعلیٰ سطحی دوریاں نے دوطرفہ تعلقات نوں مزید مضبوط کیتا اے۔ لیبر تے افرادی قوت دے شعبے وِچ ہون والی پیش رفت دونوں مُلکاں دی منظم تے مسلسل کوششاں دا نتیجہ اے، زراعت دے شعبے وِچ مشترکہ تعاون توں وی مثبت تے عملی نتائج حاصل ہون دی توقع اے۔ ایہدے توں علاوہ وزیرِ خزانہ محمد اورنگزیب تے وزیرِ خارجہ اسحاق ڈار نال وی بیلاروس دے وزیرِ توانائی نے ملاقات کیتی جیہدے وِچ اقتصادی تعاون مزید مضبوط کرن تے تبادلہ خیال کیتا گیا، وزیرِ خزانہ نے آکھیا کہ اقتصادی روابط نوں فروغ دین لئی مشاورت دا عمل مزید وسیع کیتا جانا چاہیدا اے۔ نائب وزیرِ اعظم و وزیرِ خارجہ سینیٹر اسحاق ڈار نال بیلاروس دے وزیرِ توانائی ڈینس ماروز نے ملاقات کیتی جیہدے وِچ دوطرفہ تعلقات دے مثبت فروغ تے اطمینان دا اظہار کیتا گیا۔
