مریم نواز دا سیف سمارٹ سٹیز پراجیکٹ یونین کونسلاں تک لے جان دا اعلان
مزید 1500 پینک بٹن نصب کراں گے، شہباز نوں کریڈٹ نہ دینا زیادتی ہووے گی، اب پنجاب وچ کوئی نو گو ایریا نہیں، کون کہندا اے صرف لاہور وچ کام ہو رہا اے، پنجاب وچ تو جانوراں دی بھی حفاظت کیتی جاندی: خطاب، یوم آزادی تے مبارکباد۔
لاہور (نیوز ایجنسیاں) وزیراعلیٰ پنجاب مریم نواز شریف نے 14 اگست تے خاص تے تاریخی پراجیکٹ، پنجاب انٹیگریٹڈ سیف سٹی نیٹ ورک دا ڈیجیٹل افتتاح کر دتا، پنجاب تمام 41 اضلاع تے 02 تحصیلاں وچ مربوط سیف سٹی نیٹ ورک قائم کرن والا پاکستان دا پہلا صوبہ بن گیا اے، پولیس، سی سی ڈی تے سیف سٹیز اتھارٹی دی مشترکہ کوششاں نال جرائم وچ تقریباً 80 فیصد کمی ریکارڈ ہوئی اے، وزیراعلیٰ نے سیف سٹی ہیڈکوارٹرز وچ منعقدہ تقریب نال خطاب کردے ہوئے پوری قوم نوں مبارکباد پیش کیتی تے سیف سمارٹ سٹیز پراجیکٹ نوں ہر تحصیل تے یونین کونسل تک لے جان تے مزید 1500 پینک بٹن نصب کرن دا اعلان کردے ہوئے کہا کہ ہر پولیس سٹیشن تے نمایاں عوامی تھانواں تے پینک بٹن لگائے جان گے، پنجاب دے تمام اضلاع وچ قائم سیف سٹی نیٹ ورک دی تقریب دا یوم آزادی تے انعقاد اعزاز اے۔ روشن چہریاں تے جواں ہمت بچوں نوں دیکھ کے یقین ہوندا اے کہ پنجاب اگے ودھ رہا اے، ایہ کدی آنچ نہیں آؤن دین گے۔ روجھان تے ہارون آباد جیسے دور دراز علاقیاں توں آؤن والے بچوں دا پولیس کمیونیکیشن آفیسر بننا خوش آئند اے۔
اج سیف سٹی اتھارٹی دیکھ کے میں سر جھکا کے اللہ دا شکر ادا کردی واں۔ شہباز شریف صاحب نوں سیف سٹی اتھارٹی دا کریڈٹ نہ دتا جاوے تو زیادتی ہووے گی۔ شہباز شریف صاحب میرے چچا، مینٹور تے سیف سٹی دے بانی نے۔ اڑھائی سال وچ اللہ تعالیٰ دے فضل و کرم نال پنجاب دا ہر ضلع سیف سٹی بن چکا اے، اک ہی سکرین تے پورے پنجاب دا نظر آؤنا معمولی بات نہیں۔ پنجاب ٹیکنالوجی سیفٹی ماڈل وچ نیشنل لیڈر بن چکا اے۔ ماضی وچ پنجاب دے 70 توں زائد علاقے نو گو ایریا کہلاندے سن جتھے شام نوں آمد و رفت بند کر دتی جاندی سی، اب اللہ تعالیٰ دے فضل و کرم نال کچے سمیت پنجاب دا کوئی علاقہ نو گو ایریا نہیں۔ کچے دے علاقے وچ تقریباً 10 ماہ توں سنگین جرائم تے اغوا برائے تاوان دی کوئی واردات نہیں ہوئی۔ کچے دے علاقے وچ پہلی واری ضلعی انتظامیہ نے کرکٹ ٹورنامنٹ کرایا۔ کچے دے علاقے وچ امن و امان دی صورتحال وچ بہتری غیر معمولی بات اے، پورے پنجاب وچ پینک بٹن دی تعداد ودھا رہے آں تاکہ بچوں تے خواتین وچ احساس تحفظ اجاگر ہووے۔ کتے بھی کوئی ایونٹ ہو رہا ہووے تو سیف سٹی دی آنکھ سب نوں دیکھ رہی ہوندی اے۔ سیلاب دے دوران نائٹ ویژن کیمرے دی مدد نال انساناں تے جانوراں دی بھی نشاندہی ممکن ہوئی۔ پنجاب اوہ صوبہ اے جتھے انساناں دی نہیں بلکہ جانوراں دی بھی حفاظت کیتی جاندی اے۔
سیف سٹی کیمرے نے تاراں وچ اٹکے پرندے دی نشاندہی کیتی تو ریسکیو 1122 نے سیڑھی لگا کے اس نوں آزاد کرایا۔ پنجاب اب ہر اک لئی محفوظ تے بہتر بن چکا اے۔ پنجاب جاگ رہا اے جتھے فیصلے اندھیریاں وچ نہیں ڈیٹا دی بنیاد تے کر کے انسانی جاناں بچائیاں جاندیاں نے۔ پنجاب وچ سیف سٹی تے دوجے اقدامات نال جرائم وچ کمی آئی کیونکہ مجرم جاندے نے کیمرے دی آنکھ دیکھ رہی اے۔ کون کہندا اے کہ صرف لاہور وچ کام ہو رہا اے، ہر ڈسٹرکٹ وچ سیف سٹی نظر آوے گا۔ لوکاں لئی حکومت جاگ رہی اے۔ اللہ پاکستان نوں سدا قائم و آباد تے پرچم نوں سربلند رکھے۔ وزیراعلیٰ نے تمام اضلاع دی سیف سٹی سکریناں دا مشاہدہ بھی کیتا۔ دریں اثنا وزیراعلیٰ نے یوم آزادی تے خصوصی پیغام وچ پوری قوم نوں مبارکباد دتی تے اظہار تشکر کیتا، وزیراعلیٰ نے قائد اعظم، علامہ اقبال، محترمہ فاطمہ جناح، زعما کرام تے تمام اکابرین نوں خراج عقیدت پیش کردے ہوئے کہا کہ یوم آزادی تے ہم سب نوں تعمیر وطن وچ اپنا اپنا بھرپور کردار ادا کرن دا وعدہ نبھانا ہووے گا۔ آؤن والی نسلاں نوں بہتر تے محفوظ پاکستان دینا چاہندے آں۔ پاکستانی قوم دنیا دی بہترین قوم اے تے پاکستان دنیا دا بہترین ملک اے۔
