مستونگ: وزیر داخلہ بلوچستان دے قافلے تے حملہ، 6 پولیس اہلکار زخمی: صوبے بھر وچ موبائل فون، انٹرنیٹ معطل، ٹرین سروس 2 روز لئی بند
ضیا لانگو قلات توں کوئٹہ واپس آ رہے سن، کنڈ عمرانی دے قریب نشانہ بنایا گیا، صوبائی وزیر بلٹ پروف گاڑی دی اگلی نشست تے بیٹھے سن، ڈرائیور سائیڈ دے شیشے تے 5 گولیاں لگیاں۔ حملہ آور باغ دے اندر موجود سن تے دونوں پاسیاں توں گاڑیاں تے فائرنگ کیتی گئی، سکواڈ وچ موجود اہلکاراں نے بھرپور جواب دتا، پٹاخیاں نال ڈرایا نہیں جا سکدا: میر ضیا لانگو۔
کوئٹہ (کرائم رپورٹر، مانیٹرنگ ڈیسک) صوبائی وزیر داخلہ بلوچستان میر ضیاء اللہ لانگو دے قافلے تے مستونگ دے علاقے کھڈ کوچہ (کنڈ عمرانی) دے مقام تے نامعلوم مسلح افراد نے حملہ کیتا۔ شدید فائرنگ دے تبادلے وچ انہاں دے سکواڈ دے چھ اہلکار زخمی ہو گئے، تاہم وزیر داخلہ حملے وچ محفوظ رہے۔ صوبے بھر وچ موبائل فون، انٹرنیٹ معطل، ٹرین سروس 2 روز لئی بند۔ ذرائع دے مطابق میر ضیاء اللہ لانگو قلات وچ یوم آزادی دی تقریب وچ شرکت توں بعد کوئٹہ واپس آ رہے سن کہ مستونگ دے علاقے کنڈ عمرانی دے قریب انہاں دے قافلے نوں نشانہ بنایا گیا۔ حملے وچ زخمی ہون والے اہلکاراں نوں فوری طور تے مستونگ دے شہید نواب غوث بخش میموریل ہسپتال منتقل کیتا گیا، جتھے ابتدائی طبی امداد توں بعد بعض زخمیوں نوں مزید علاج لئی کوئٹہ روانہ کر دتا گیا۔ شدید فائرنگ دے تبادلے توں بعد حملہ آور موقعے توں فرار ہو گئے جبکہ اطلاع ملدے ہی سکیورٹی فورسز دی بھاری نفری موقعے تے پہنچ گئی تے علاقے نوں گھیرے وچ لے لیا۔
حملے توں بعد میر ضیاء اللہ لانگو نے اپنے اک بیان وچ بتایا کہ ‘حملہ آور باغ دے اندر موجود سن تے دونوں پاسیاں توں ساڈی گاڑیاں نوں نشانہ بنا رہے سن۔’ وزیر داخلہ دے مطابق انہاں دے سکواڈ نے فوری جوابی کارروائی کیتی، جس دے نتیجے وچ تقریباً 20 منٹ تک فائرنگ دا تبادلہ جاری رہا۔ انہاں نے بتایا کہ اوہ اپنی گاڑی دی اگلی نشست تے بیٹھے ہوئے سن تے حملے دے دوران انہاں دی بلٹ پروف گاڑی دے ڈرائیور سائیڈ دے شیشے تے پنج گولیاں لگیاں۔ انہاں دا کہنا سی کہ مجھے انہاں پٹاخیاں نال نہیں ڈرایا جا سکدا، پاکستان زندہ باد سی، زندہ باد اے، زندہ باد رہے گا۔ حکومت، پولیس تے سکیورٹی ادارے امن دشمن عناصر دے خلاف کارروائیاں جاری رکھن گے۔ دریں اثناء وزیر داخلہ دے معاون برائے میڈیا بابر یوسفزئی نے اپنے اک بیان وچ کہا کہ صوبائی وزیر داخلہ میر ضیاء لانگو دے قافلے تے مستونگ دے علاقے فتنہ الہندوستان نے بزدلانہ حملہ کیتا، پولیس دے بہادر جواناں نے دہشت گردوں دے حملے نوں بہادری نال پسپا کیتا۔ دریں اثنا ریلوے حکام نے کوئٹہ توں پشاور جانے والی جعفر ایکسپریس دی روانگی منسوخ کر دتی۔
ریلوے حکام دے مطابق کوئٹہ توں پشاور لئی جعفر ایکسپریس (اج) 15 اگست نوں بھی روانہ نہیں ہووے گی۔ حکام دے مطابق پشاور توں کوئٹہ آؤن والی جعفر ایکسپریس جیکب آباد تک چلائی جاوے گی۔ ریلوے حکام دے مطابق جعفر ایکسپریس دی روانگی ریلوے ٹریک دی مرمت دے سلسلے وچ منسوخ کیتی گئی اے۔ کوئٹہ سمیت بلوچستان بھر وچ موبائل فون انٹرنیٹ سروس جمعہ نوں دوجے روز بھی معطل رہی۔ کوئٹہ شہر تے بلوچستان دے دوجے علاقیاں وچ انٹرنیٹ سروس جمعرات دی دوپہر معطل کیتی گئی سی جو کہ جمعہ نوں دوجے روز بھی معطل رہی۔ موبائل فون انٹرنیٹ سروس بند ہون نال صارفین نوں مشکلات دا سامنا اے۔ بی بی سی دے مطابق اگرچہ سرکاری سطح تے انٹرنیٹ دی بندش دی وجہ نہیں بتائی گئی تاہم گزشتہ اتوار نوں جوں کوئٹہ سمیت بلوچستان بھر وچ موبائل فون انٹرنیٹ سروس بند کیتی گئی سی تو وزیر داخلہ میر ضیا اللہ لانگو نے اس دی وجہ سکیورٹی خدشات بتائی سی۔
