لاہور ہائیکورٹ: چیف جسٹس نے قومی پرچم لہرایا

جسٹس عابد عزیز سمیت دوجے ججاں تے ہائیکورٹ دے سٹاف دی تقریب وچ شرکت، عدلیہ قائد اعظمؒ دے ویژن دے مطابق انصاف دی فراہمی لئی کوشاں: جسٹس عالیہ نیلم۔

لاہور (اے پی پی، مانیٹرنگ ڈیسک) لاہور ہائیکورٹ وچ پاکستان دے 79 ویں یومِ آزادی دے سلسلے وچ پرچم کشائی دی تقریب دا اہتمام کیتا گیا، چیف جسٹس لاہور ہائیکورٹ جسٹس عالیہ نیلم نے عدالتِ عالیہ دی تاریخی عمارت تے پرچم لہرایا، اس موقعے تے جسٹس عابد عزیز شیخ، جسٹس شہباز علی رضوی، جسٹس چودھری محمد اقبال تے جسٹس طارق سلیم شیخ سمیت دوجے ججز، لاہور ہائیکورٹ دے افسران و سٹاف تے انہاں دے اہلخانہ بھی موجود سن۔ چیف جسٹس عالیہ نیلم نے تقریب نال خطاب وچ کہا کہ ساڈے لئی باعثِ مسرت اے کہ اسیں اج یومِ آزادی منا رہے آں، سانوں اج دے دن عہد کرنا اے کہ سانوں قائد اعظم محمد علی جناح ؒ دے ویژن دے مطابق کام کرنا اے، پنجاب دی عدلیہ قائدِ اعظمؒ دے ویژن دے مطابق بہترین انداز وچ انصاف دی فراہمی لئی کوشاں اے، اج دا دن سانوں انہاں امیداں تے امنگاں دی یاددہانی بھی کراؤندا اے جنہاں لئی پاکستان معرضِ وجود وچ آیا، ساڈی مسلسل کوشش اے کہ انصاف دی فراہمی دے عمل نوں مزید موثر تے تیز بنایا جاوے۔ چیف جسٹس نے بتایا کہ کیس مینجمنٹ دے تحت مختلف مقدمات دی درجہ بندی کیتی گئی جس دے مثبت نتائج نہ صرف ڈسٹرکٹ جوڈیشری بلکہ لاہور ہائیکورٹ دی سطح تے بھی سامنے آئے؛ 2025 وچ لاہور ہائیکورٹ دی تاریخ وچ سب توں زیادہ 1 لکھ 73 ہزار توں زائد مقدمات دے فیصلے کیتے گئے، اسی طرح ضلعی عدلیہ وچ بھی گزشتہ دو سالاں وچ 80 لکھ توں زائد مقدمات دے فیصلے کیتے گئے۔