جیلانی پارک وچ لاہور دا سبھ توں وڈا تے بلند پرچم لہرا دتا گیا

79 ویں یومِ آزادی تے 100 فٹ چوڑا پرچم 200 فٹ بلندی تے لہرایا گیا؛ یومِ آزادی مکہ معاہدے دے نام، مسلم امہ دا اتحاد نیک شگون: بلال یاسین

لاہور (سٹاف رپورٹر سے) زندہ دلان دے شہر دے جیلانی پارک وچ لاہور دا سبھ توں وڈا تے بلند پرچم فضا وچ لہرا دتا گیا۔ وزیر ہاؤسنگ پنجاب بلال یاسین نے 100 فٹ چوڑے جھنڈے نوں 200 فٹ دی بلندی تے لہرایا۔ اس موقعے تے صوبائی وزیر بلال یاسین نے کہا کہ 79 واں یومِ آزادی مکہ معاہدے دے نام، امتِ مسلمہ دا اتحاد نیک شگون اے۔ پاکستان دی سیاسی و عسکری قیادت نے تاریخ دے دھارے نوں موڑ دتا اے۔ انہاں نے سیاسی مخالفین نوں مخاطب کردے ہوئے کہا کہ ستاریاں دے حال دسن والیاں توں بھی پوچھ لوو، پاکستان نوں دیوالیہ کروان دییاں سازشاں بے نقاب ہو چکیاں نے۔ وزیراعظم شہباز شریف، فیلڈ مارشل تے ڈپٹی وزیراعظم دییاں انتھک کوششاں نوں کسی صورت فراموش نہیں کیتا جا سکدا۔ بعد ازاں صوبائی وزیر بلال یاسین نے کیک کاٹیا تے تحائف تقسیم کیتے۔ چیئرمین پی ایچ اے غزالی سلیم بٹ نے کہا کہ پاکستان دی ترقی و خوشحالی ساڈا مشترکہ مشن اے۔ ایم ڈی احمد عثمان جاوید نے کہا کہ گرین لاہور لئی وزیراعلیٰ دے وژن مطابق اقدامات جاری رہن گے۔