ملکی استحکام لئی سبھ نوں متحد ہونا پوے گا: فیصل کریم کنڈی

پختونخوا وچ امن لئی سکیورٹی فورسز دے نال آں، تقریبِ پرچم کشائی توں خطاب؛ گورنر نال ایرانی قونصل جنرل دی ملاقات، پشاور مشہد براہِ راست پروازاں تے تبادلہِ خیال

پشاور (آن لائن) گورنر خیبر پختونخوا فیصل کریم کنڈی نے کہا اے کہ ملک دی سلامتی، امن تے ترقی لئی پوری قوم نوں متحد ہو کے اپنا کردار ادا کرنا پوے گا۔ صوبے دے امن و سلامتی لئی خیبر پختونخوا دی سکیورٹی فورسز دے نال پوری قوم کھلوتی اے۔ 79ویں یومِ آزادی دے موقعے تے گورنر ہاؤس پشاور وچ پرچم کشائی دی تقریب منعقد ہوئی جس توں بعد میڈیا نال گفتگو کردے ہوئے گورنر نے کہا اللہ تعالیٰ دا شکر اے کہ اسیں اک آزاد ملک وچ آزادی دی ساہ لے رہے آں۔ یومِ آزادی سانوں انہاں عظیم شہدا دی قربانیاں دی یاد دواؤندا اے جنہاں نے وطن دی مٹی تے اس دی سلامتی لئی اپنی جنداں دا نذرانہ پیش کیتا۔ انہاں نے کہا کہ ایران، امریکا تنازع دے دوران پاکستان نے مثبت تے ذمہ دارانہ کردار ادا کیتا، جس نوں عالمی سطح تے قدر دی نگاہ نال ویکھیا جا رہا اے۔ دریں اثنا گورنر خیبر پختونخوا نال اسلامی جمہوریہ ایران دے قونصل جنرل علی بنفشہ خواہ نے گورنر ہاؤس وچ ملاقات کیتی جس دے دوران پشاور تے مشہد دے درمیان براہِ راست پروازاں شروع کرن دے معاملے تے بات چیت ہوئی۔