واہگہ بارڈر تے پرچم لاہن دی تقریب، فضا پاکستان زندہ باد دے نعریاں نال گونجدی رہی

لاہور واہگہ بارڈر تے پرچم لاہن دی تقریب منعقد ہوئی جس وچ عوام نے کثیر تعداد وچ شرکت کیتی تے فضا پاکستان زندہ باد دے فلک شگاف نعریاں نال گونجدی رہی، تقریب دے آغاز وچ قومی ترانہ پڑھیا گیا۔

تقریب وچ موجود شہریاں نے بڑی تعداد وچ ہتھاں وچ قومی پرچم تھام رکھے سن، نوجواناں دا جوش و خروش دیدنی سی، تقریب دے دوران نعرہ تکبیر، پاکستان زندہ باد، پاک فوج زندہ باد دے نعرے بلند ہوندے رہے۔ پاکستان رینجرز دی ولولہ انگیز پریڈ دیکھ کے حاضرین دا جذبہ حب الوطنی مزید ودھ گیا، پاکستان رینجرز دے دستے وچ خواتین اہلکار وی شامل سن۔ پاکستان رینجرز دے شیر دل جواناں دے قدماں دی دھمک تے وطن دی حفاظت دے جذبے دی چمک نے حاضرین دا لہو خوب گرمایا تے پنڈال وچ موجود بچے، بزرگ تے خواتین پرجوش انداز وچ اپنے سپاہیاں دا حوصلہ ودھاؤندے رہے۔