بجلی دا گردشی قرضہ 61 ارب ودھ گیا: آئی پی پیز، پی ایچ ایل تے قرضے دی فنانسنگ تے سود دی مد وچ 14 ارب روپئے دا وادھا۔
تقسیم کار کمپنیاں دے نقصاناں تے انتظامی نااہلیاں باجھوں وی قرضے وچ 262 ارب دا وادھا ہویا، کمپنیاں نوں واجب الادا رقم 77 ارب گھاٹے توں بعد 784 ارب روپئے رہ گئی۔ کے الیکٹرک ولوں ادائیگی نہ کرنا گردشی قرضے وچ وادھے دیاں اہم وجوہات وچ شامل، کمپنیاں نوں بالݨ (ایندھن) دیݨ والیاں نوں واجب الادا رقم وچ 3 ارب دی معمولی کمی۔
اسلام آباد(مانیٹرنگ ڈیسک، نیوز ایجنسیاں) پاکستان دے بجلی دے شعبے دا گردشی قرضہ مالی سال 2025-26 دے دوران 61 ارب روپئے ودھ کے جون 2026 دے انت (اختتام) تے 1675 ارب روپئے تیکر اپڑ گیا، جہڑا جون 2025 دے انت تے 1614 ارب روپئے سی۔ تازہ ترین گردشی قرضے دی رپورٹ موجب مالی سال دے دوران بجلی بناوݨ والیاں کمپنیاں نوں ادائیگی دی واجب الادا رقم 77 ارب روپئے گھٹ کے 784 ارب روپئے رہ گئی، جہڑی پچھلے ورھے 861 ارب روپئے سی۔ ایویں ای بجلی بناوݨ والیاں سرکاری کمپنیاں (جینکوز) دی بالݨ دیݨ والیاں نوں واجب الادا رقم وی معمولی کمی توں بعد 90 ارب روپئے رہ گئی، جہڑی ایک ورھا پہلے 93 ارب روپئے سی۔
رپورٹ موجب حکومت ولوں گردشی قرضے دی فنانسنگ مالی سال 2025-26 وچ 801 ارب روپئے رہی، جبکہ پچھلے مالی سال پاور ہولڈنگ لمیٹڈ (پی ایچ ایل) وچ 660 ارب روپئے رکھے گئے سن۔ فنانسنگ دے اس حصے نے مجموعی گردشی قرضے وچ وادھے وچ وڈا کردار ادا کیتا۔ مالی سال دے دوران وکھو وکھ کارناں (عوامل) باجھوں گردشی قرضے وچ مجموعی طور تے 364 ارب روپئے دا وادھا ہویا، پر مالی گنجائش توں کیتیاں گئیاں ادائیگیاں، جنہاں وچ 302 ارب روپئے دیاں سٹاک ادائیگیاں شامل نیں، نے اس وادھے نوں کجھ حد تیکر گھٹ کیتا۔ نتیجے وِچ گردشی قرضے وچ خالص وادھا نیڑے تیکر 61 ارب روپئے رہیا۔
رپورٹ موجب کے الیکٹرک ولوں ادائیگی نہ کرنا گردشی قرضے وچ وادھے دیاں اہم وجوہات وچ شامل رہیا۔ اس مد وچ مالی سال 2025-26 دے دوران 194 ارب روپئے دا وادھا ہویا، جبکہ پچھلے مالی سال ایہ رقم صرف چار ارب روپئے سی۔ بجلی دیاں تقسیم کار کمپنیاں (ڈسکوز) دے نقصاناں تے انتظامی نااہلیاں باجھوں وی گردشی قرضے وچ 262 ارب روپئے دا وادھا ہویا۔ پر ایہ رقم پچھلے مالی سال دے 265 ارب روپئے دے مقابلے وچ معمولی گھٹ رہی۔ ڈسکوز ولوں بجلی دی پوری قیمت وصول نہ کیتے جاݨ باجھوں 64 ارب روپئے دا وادھا ہویا، جہڑا پچھلے ورھے دے 132 ارب روپئے دے مقابلے وچ کافی گھٹ اے۔ دوجے پاسے آئی پی پیز، پی ایچ ایل تے گردشی قرضے دی فنانسنگ تے سود دی مد وچ 14 ارب روپئے دا وادھا ہویا، جبکہ پچھلے مالی سال اس مد وچ 58 ارب روپئے شامل ہوئے سن۔
