پہلاں حسینہ واجد نوں ساڈے حوالے کرو، بنگلہ دیشی وزیر اعظم دا دورہ بھارت اچانک منسوخ۔
حسینہ تے دوجے مفرور مجرماں دی حوالگی تیکر وزیر اعظم بھارت نہیں جاݨ گے، سفر لئی سازگار ماحول بݨاوݨ دی لوڑ اے: بنگلہ دیشی وزارت خارجہ؛ حکومت “بنگلہ دیش فرسٹ” خارجہ پالیسی اختیار کرے گی، بھارت تے دوجے دیساں نال باہمی مفاد تے مبنی تعلقات رکھاں گے: اے کے ایم شاہد الکریم۔
ڈھاکہ (اے ایف پی) بنگلہ دیش دے وزیر اعظم طارق الرحمن دا دورہ نئی دہلی اچانک منسوخ کر دتا گیا۔ بنگلہ دیش نے آکھیا اے کہ وزیر اعظم طارق الرحمن بھارت دا دورہ اس ویلے تیکر نہیں کرن گے جندوں تیکر نئی دہلی سابق وزیر اعظم شیخ حسینہ واجد نوں بنگلہ دیش دے حوالے نہیں کردا۔ بنگلہ دیشی وزارت خارجہ دے اہلکاراں موجب حسینہ واجد دی حوالگی لئی بھارت توں کوششاں تیز کرن دا مطالبہ کیتا گیا اے۔ بنگلہ دیش دی وزارت خارجہ نے اتوار نوں باضابطہ طور تے آکھیا کہ سفر لئی سازگار ماحول بݨاوݨ دی لوڑ اے۔ وزارت خارجہ دے ترجمان اے کے ایم شاہد الکریم نے اتوار دی سہ پہر ڈھاکہ وچ وزارت خارجہ وچ ہوئی اک پریس بریفنگ دوران ایہ اعلان کیتا۔ اس توں پہلے بھارتی میڈیا نے اشارہ دتا سی کہ طارق الرحمن اگلے ہفتے دے ادھ (منجھ) وچ دو دہاڑیاں دے دورے تے بھارت آ سکدے نیں۔ ڈھاکہ وچ بنگلہ دیشی حکام نے وی پچھلے ہفتے وزیر اعظم دے دورہ بھارت دیاں تیاریاں دا اشارہ دتا سی۔
ترجمان نے آکھیا کہ اساں بھارتی حکام توں مطالبہ کیتا اے کہ اوہ شیخ حسینہ تے دوجے مفرور مجرماں نوں فوراً واپس گھلݨ تے دو طرفہ حوالگی دے معاہدے تحت شہید شریف عثمان ہادی دے قتل وچ ملوث ملزماں نوں بنگلہ دیش دے حوالے کرن۔ بنگلہ دیش جواب دا منتظر اے۔ کریم نے مزید آکھیا کہ وزیر اعظم دے دورہ بھارت دے عمل نوں شیخ حسینہ ولوں میڈیا وچ کھل کے بیانات دیݨ نال نقصان اپڑیا اے، حالانکہ اوہ انسانیت خلاف جرائم دے مقدمے وچ مجرم قرار دتی جا چکی نیں۔
اوہناں آکھیا کہ بنگلہ دیش دی حکومت “بنگلہ دیش فرسٹ” خارجہ پالیسی اختیار کرے گی، جیہدی بنیاد ملکی خودمختاری تے دوجے دیساں دے اندرونی معاملیاں وچ عدم مداخلت تے ہووے گی۔ اس دے نال بھارت تے دوجے دیساں نال باہمی مفاد تے مبنی تعلقات دے وادھے دی کوشش وی جاری رکھی جاوے گی۔ واضح روے جندوں لوک سبھا دے سپیکر اوم برلا، طارق الرحمن دی بطور وزیر اعظم حلف برداری دی تقریب وچ شرکت لئی گئے سن، تاں اوہناں وزیر اعظم مودی ولوں طارق الرحمن نوں بھارت دے دورے دی باضابطہ دعوت دتی سی۔ یاد روے حسینہ واجد 2024 وچ حکومت مخالف احتجاج توں بعد بھارت فرار ہو گئی سن تے بنگلہ دیش وچ انسانیت خلاف جرائم دے مقدمے وچ سزائے موت پا چکی نیں۔
