جماعت اسلامی دے مہنگائی، پیٹرولیم لیوی خلاف صوبائی دارالحکومتاں وچ دھرنے: موجودہ نظام ہور نہیں چل سکدا: حافظ نعیم۔
لاہور وچ مسجد شہداء توں احتجاجی مارچ کردے ہوئے چیئرنگ کراس اپڑ کے دھرنا، شرکاء دی سخت نعرے بازی؛ عوام نکلے تاں نواز، شہباز شریف نوں بھجݨ (بھاگنے) دی تھاں نہیں ملے گی: امیر جماعت اسلامی؛ کراچی، پشاور تے کوئٹہ وچ وی احتجاج۔
لاہور، کراچی، پشاور (سیاسی نمائندہ، مانیٹرنگ ڈیسک) جماعت اسلامی پاکستان نے ودھدی مہنگائی، بھارے بجلی بلاں تے پیٹرولیم لیوی وچ وادھے خلاف احتجاجی تحریک دے دوجے مرحلے دا آغاز کر دتا تے لاہور، کراچی، پشاور، کوئٹہ سمیت سارے صوبائی دارالحکومتاں دے اہم تھانواں تے دھرنے دے دتے۔ لاہور وچ فیصل چوک مال روڈ تے ایوان وزیراعلیٰ دے نیڑے دھرنے وچ امیر جماعت اسلامی پاکستان حافظ نعیم الرحمن نے وی شرکت کیتی۔ تفصیلات موجب لاہور وچ جماعت اسلامی دے کارکنان نے مال روڈ تے مسجد شہداء توں چیئرنگ کراس تیکر احتجاجی مارچ کیتا تے دھرنا دتا۔ امیر جماعت اسلامی لاہور ضیاء الدین انصاری دی زیر قیادت مارچ وچ کارکناں دی وڈی تعداد نے شرکت کیتی جنہاں نے ہتھاں وچ بینرز، کتبے تے پینافلیکس چُکے ہوئے سن۔
شرکاء نے حکومتی پالیسیاں دے خلاف سخت نعرے بازی وی کیتی۔ دھرنے نال قائم مقام سیکرٹری جنرل جماعت اسلامی پاکستان نذیر جنجوعہ، اسامہ رضی، شیخ عثمان، اظہر اقبال، جاوید قصوری، ضیاء الدین، ڈاکٹر بابر رشید، خالد بٹ، اظہر بلال، ذیشان اختر، ذکر اللہ مجاہد تے دوجیاں نے وی اپنے خیالات دا اظہار کیتا۔ اس موقعے تے حافظ نعیم الرحمن نے شرکاء نال خطاب کردے ہوئے آکھیا کہ ایہ نظام جو ساڈے تے مسلط اے ایہدا عوام نال کوئی تعلق نہیں، ظلم تے زیادتی تے استحصال دا نظام ہن نہیں چل سکدا، اج لوکاں لئی اپنے بالاں (بچیاں) دا ڈھڈ پالݨا اوکھا ہو گیا اے، مراعات یافتہ طبقہ عوام دا خون نچوڑ رہا اے، مریم نواز تے شہباز شریف دی گورننس ناکام ہو چکی اے، پنجاب تے وفاق وچ کرپشن دے ڈھیر نیں۔
امیر جماعت اسلامی نے حکومتی وزراء تے مشتمل کمیٹی نوں مسترد کردے ہوئے آکھیا کہ شہباز شریف سن لیں، جماعت اسلامی حکومتی بریفنگ لیݨ اسلام آباد نہیں جاوے گی، جیہنے گل کرنی اے وہ دھرنے وچ آ کے گل کرے، موجودہ حکمران فارم 47 دی پیداوار نیں تے عوام دے پسندیدہ نہیں، جے عوام نکل آئی تاں شہباز شریف تے نواز شریف نوں بھجݨ دی تھاں نہیں ملے گی، طاقت راہیں عوام نوں کچلیا نہیں جا سکدا، ایہ تحریک حکومت ڈاھو (گراؤ) تحریک وچ بدل سکدی اے۔
اوہناں آکھیا کہ جماعت اسلامی دا دھرنا 25 کروڑ عوام دا نمائندہ دھرنا اے تے ایہنوں جنا لمبا کرنا پیا کیتا جاوے گا، حکومت پیٹرول دی فی لیٹر قیمت 225 روپئے مقرر کرے، پیٹرول تے عائد لیوی، آئی پی پیز نال ناجائز معاہدے تے بجلی دی لوڈشیڈنگ ختم کیتی جاوے، مطالبات دی منظوری تیکر دھرنا جاری رہے گا۔ اس توں پہلے نذیر جنجوعہ نے آکھیا کہ حکومت فوراً پیٹرولیم مصنوعات دیاں قیمتاں وچ کمی، غیر ضروری لیویز تے ظالمانہ ٹیکساں دا خاتمہ کرے۔ جاوید قصوری نے آکھیا کہ حکومت نوں محض اعلانات دی بجائے عملی قدم چکݨے ہوݨ گے۔ ضیاء الدین انصاری نے آکھیا کہ عوام اپنے بنیادی حقاں تے معاشی مسئلہ حل کرن لئی پرامن طور تے اپنا احتجاج ریکارڈ کرا رہے نیں۔
ادھر کراچی وچ خضراء مسجد توں جماعت اسلامی نے احتجاجی ریلی دا آغاز کیتا جو کراچی پریس کلب روڈ توں ہوندی ہوئی گورنر ہاؤس ول روانہ ہوئی تاں انتظامیہ نے گورنر ہاؤس جاݨ والے رستیاں نوں کنٹینر لا کے بند کر دتا جیہدے باجھوں امیر جماعت اسلامی کراچی منعم ظفر دی قیادت وچ شرکاء نے گورنر ہاؤس دے نیڑے فوارہ چوک تے دھرنا دے دتا۔ ایویں ای پشاور وچ گورنر ہاؤس دے نیڑے امیر جماعت اسلامی وسطی خیبر پختونخوا عبدالواسع دی زیر قیادت دھرنا دتا گیا۔
