۲۷ ستمبر دا مارچ ملک تے قوم دی تقدیر بدل دیوے گا: سہیل آفریدی

پختونخوا دے لوکاں نوں کیڑے مکوڑے سمجھن دی روش ہور قبول نہیں کراں گے، عمران قوم لئی ناحق قید تے بند دیاں صعوبتاں برداشت کر رہے نے: وزیراعلیٰ پختونخوا

کوہاٹ، بنوں (این این آئی) وزیراعلیٰ خیبرپختونخوا سہیل آفریدی نے کہیا اے کہ ۲۷ ستمبر دے لانگ مارچ لئی بھرپور تے بہترین تیاری کیتی جاوے گی تے ایس واری ملک تے قوم دی تقدیر تے تاریخ دوویں بدل دیواں گے، پختونخوا پچھلے دو دہاکیاں توں تجربہ گاہ بنیا ہویا اے تے صوبے دے لوکاں نوں کیڑے مکوڑے سمجھن دی روش ہور قبول نہیں کیتی جاوے گی۔ ایہناں خیالات دا اظہار اُنہاں نے پچھلے دہاڑے بنوں پہنچن اُتے پی ٹی آئی دی ۲۷ ستمبر دے لانگ مارچ دے سلسلے وِچ منعقدہ سٹریٹ موومنٹ ریلی نال خطاب کردے ہوئے کیتا، ایس موقعے اُتے پی ٹی آئی پختونخوا دے صدر جنید اکبر سمیت ارکانِ پارلیمنٹ تے پارٹی رہنما، کارکنان وی اُنہاں دے نال سن۔

وزیراعلیٰ نے مزید کہیا کہ ۲۷ ستمبر دے مارچ لئی بھرپور تیاری کرنی ہووے گی، کارکن اتحاد تے یکجہتی دا مظاہرہ کرن تے اپنے مستقبل لئی جرات نال باہر نکلن، ۲۰۲۲ تک خیبرپختونخوا وِچ امن سی تاہم اوہدے بعد دے حالات سب دے سامنے نے، بند کمریاں وِچ کیتے فیصلےآں نے امن نوں تباہ کر دتا، امن دی بحالی لئی ہر ممکن قدم چکاں گے، پختونخوا پولیس امن دی بحالی تے لوکاں دے تحفظ لئی سینہ سپر اے، پولیس لئی ۱۹۱ ارب روپے دا بجٹ مختص کیتا اے، حکومت صوبے تے لوکاں دے خلاف ہر فیصلے دی مخالفت کرے گی۔ وزیراعلیٰ نے کہیا کہ عمران خان نے امن قائم کیتا تے قوم دی عزتِ نفس بحال کیتی، اوہ قوم دے مستقبل لئی ناحق قید دیاں صعوبتاں برداشت کر رہے نے، اسیں اپنے لیڈر دی رہائی لئی نکلں گے، حقیقی آزادی دی جدوجہد وِچ عدلیہ تے میڈیا دی آزادی وی بحال کرنی ہووے گی۔