دعویٰ ملکیت صرف ریونیو ریکارڈ توں ثابت نہیں ہوندا: سپریم کورٹ

انتقال ریونیو تے مالیاتی مقاصد لئی ہوندا اے، ملکیت دا ثبوت نہیں: عدالت دا تفصیلی فیصلہ، لین دین ثابت کرنا ہووے گا، اپیل خارج، ماتحت عدالتاں تے پشاور ہائیکورٹ دے فیصلے برقرار

اسلام آباد (اے پی پی) سپریم کورٹ نے قرار دتا کہ انتقال دے اندراج توں بذاتِ خود ملکیت پیدا ہوندی اے تے نہ ای ختم ہوندی اے بلکہ انتقال بنیادی طور اُتے ریونیو تے مالیاتی مقاصد لئی ہوندا اے، ملکیت دی منتقلی ثابت کرن لئی بنیادی لین دین دا قابلِ اعتماد ثبوت پیش کرنا ضروری اے۔ عدالت نے زرعی اراضی دی ملکیت نال متعلق سول اپیل خارج کردے ہوئے ماتحت عدالتاں تے پشاور ہائی کورٹ دے فیصلے برقرار رکھے۔ سپریم کورٹ نے تفصیلی فیصلے وِچ قرار دتا کہ صرف پرانی فروخت دی دستاویز تے ریونیو ریکارڈ وِچ اندراج کسے شخص دے حق وِچ ملکیت ثابت کرن لئی کافی نہیں، خصوصاً جَدوں بنیادی فروخت ای قابلِ اعتماد شواہد توں ثابت نہ ہو سکے۔ فیصلے دے مطابق مبینہ فروخت نامے وِچ اراضی دی قیمت ۹۰ روپے جبکہ متعلقہ انتقال وِچ ۱۰۰ روپے درج سی، جِس دا کوئی تسلی بخش جواز پیش نہیں کیتا گیا۔ مزید برآں فروخت نامے وِچ اراضی دے خسرا نمبرز وی درج نہیں سن بلکہ صرف حداں بیان کیتیاں گیاں سن۔

عدالت نے قرار دتا کہ اگرچہ ۳۰ سال توں زائد پرانی دستاویز دے حوالے نال قانون دے تحت کچھ قرائن موجود ہو سکدے نے، تاہم ایہوجیہا قرینہ حتمی نہیں ہوندا تے حالات و شواہد دی روشنی وِچ بنیادی لین دین نوں ثابت کرنا ضروری اے۔ سپریم کورٹ نے ایہ وی نوٹ کیتا کہ فروخت نامے اُتے موجود گواہاں دے دستخط یا انگوٹھے دے نشاناں دی باقاعدہ شناخت نہیں کرائی گئی تے کسے گواہ نوں پیش کر کے دستاویز دی تصدیق نہیں کیتی گئی۔ فیصلے وِچ کہیا گیا کہ ریونیو ریکارڈ وی اپیل کنندگان دے موقف دی حمایت نہیں کردا۔ ایہناں دے پیشرو دا نام ملکیت دی بجائے کاشت دے خانے وِچ درج سی جبکہ مدعی دے پیشرو دا نام مسلسل مالک دے طور اُتے درج ہوندا رہا۔ عدالت نے قرار دتا کہ مدعی دی طرفوں بعد وِچ مذکورہ اراضی نوں زرعی ترقیاتی بینک کول رہن رکھنا تے رہن واپس حاصل کرنا وی ایس گل دی تائید کردا اے کہ مبینہ فروخت دے دعوے دے باوجود اصل ملکیتی ریکارڈ مدعی دے پیشرو دے نام موجود رہا۔ سپریم کورٹ نے قرار دتا کہ انتقال نمبر ۶۳ دے حوالے نال وی مکمل سرکاری ریکارڈ پیش نہیں کیتا گیا۔ صرف پرت پٹوار پیش کیتی گئی جبکہ پرت سرکار پیش نہ کیتی گئی، جِس اُتے عدالت نے منفی قرینہ اخذ کیتا۔ پشاور ہائی کورٹ دے فیصلے وِچ کوئی ایہوجہی قانونی یا شواہد نال متعلق خامی موجود نہیں جِس دی بنیاد اُتے سپریم کورٹ مداخلت کرے۔