اسلام آباد ایئرپورٹ، جعلی ویزے اُتے نیدرلینڈز جان والا آف لوڈ

مسافر ایس توں پہلے ملائشیا، تھائی لینڈ، سعودیہ سمیت کئی ملکاں دا سفر کر چکا، قانونی کارروائی لئی ایف آئی اے اینٹی ہیومن ٹریفکنگ سرکل اسلام آباد منتقل

اسلام آباد (اے پی پی) ایف آئی اے نے اسلام آباد انٹرنیشنل ایئرپورٹ اُتے مبینہ طور اُتے نیدرلینڈز دے جعلی وزٹ ویزے دا پتہ لان توں بعد سوات دے رہائشی نوں آف لوڈ کر دتا۔ ایف آئی اے دے اِک اہلکار نے دسیا اے کہ مسافر نوں ۱۴ اگست نوں ثانوی پروفائلنگ دے دوران نجی ہوائی کمپنی دی پرواز PA-270 اُتے سعودی عرب جان دی تیاری دے دوران روکیا گیا، سفری دستاویزاں دی تفصیلی جانچ پڑتال توں ایہ گل سامنے آئی کہ مسافر دے پاسپورٹ دے صفحہ ۱۸ اُتے چسپاں ہالینڈ دا وزٹ ویزا جعلی سی۔ مسافر دی ٹریول ہسٹری دا جائزہ لین توں معلوم ہویا کہ اوہ ایس توں پہلے ملائشیا، تھائی لینڈ تے سعودی عرب سمیت مختلف ملکاں دا کئی وار سفر کر چکا اے۔ ایف آئی اے نے کہیا کہ مسافر نوں پرواز توں آف لوڈ کر کے اوہدے موبائل فون دی فرانزک جانچ تے مزید قانونی کارروائی لئی اینٹی ہیومن ٹریفکنگ سرکل اسلام آباد دے حوالے کر دتا گیا اے۔