چھویں سپیل دا الرٹ جاری، اج توں ۲۱ اگست تیکر مزید بارشاں
راولپنڈی، گوجرانوالہ، گجرات، سیالکوٹ، لاہور وِچ اربن فلڈنگ دا امکان ودھ گیا؛ بھارت نے سلال ڈیم دے سارے گیٹ مکمل کھول دتے، سیلابی صورتحال دی وارننگ
لاہور (اے پی پی) پی ڈی ایم اے نے صوبے بھر وِچ مون سون بارشاں دے چھویں سپیل دا الرٹ جاری کر دتا، ۲۱ اگست تیکر زیادہ تر اضلاع وِچ بارشاں دی پیشگوئی اے۔ بھارت نے سلال ڈیم دے سارے گیٹ مکمل طور اُتے کھول دتے، جیہدے توں بعد دریائے چناب وِچ پاکستان ول پانی دا اخراج شروع ہو گیا اے۔ پانی دی سطح وِچ اضافے دے خدشے دے پیشِ نظر نشیبی علاقیاں لئی الرٹ جاری کر دتا گیا۔ فلڈ فارکاسٹنگ ڈویژن دے مطابق ہیڈ مرالہ، خانکی تے قادر آباد اُتے پانی دے شدید دباؤ دا خدشہ اے۔ اعلامیے دے مطابق ہیڈ مرالہ دے مقام اُتے اگلے ۴۸ گھنٹیاں وِچ اونچے درجے دا سیلابی ریلا لنگھن دا امکان اے، دریائے چناب نال جڑے علاقیاں دی مقامی انتظامیہ نوں الرٹ رہن دی ہدایت کر دتی گئی اے۔
مالاکنڈ درگئی وِچ موسلادھار بارش پاروں کچے مکان دی چھت ڈگن نال ۹ ورھیاں دا بال جاں بحق ہو گیا۔ درگئی دے علاقے سدرا جووڑ، باری پل وِچ شدید بارش ہوئی جیہدے نتیجے وِچ اِک کچے مکان دے برآمدے دی چھت اچانک ڈگ پئی۔ حادثے دے نتیجے وِچ ۹ ورھیاں دا ولید خان ملبے تھلے دب گیا تے موقعے اُتے ہی دم توڑ گیا۔
ترجمان پی ڈی ایم اے دے مطابق راولپنڈی، مری، گلیات، جہلم، چکوال، تلہ گنگ، اٹک، سیالکوٹ، نارووال، منڈی بہاؤالدین، گجرات، گوجرانوالہ، حافظ آباد، وزیر آباد، لاہور، قصور، اوکاڑہ، شیخوپورہ، ننکانہ صاحب، سرگودھا، خوشاب، میانوالی، نورپور تھل وِچ بارش دا امکان اے۔ اج توں ۲۰ اگست تیکر راولپنڈی، گوجرانوالہ، گجرات، سیالکوٹ تے لاہور دے نشیبی علاقیاں وِچ شدید بارشاں پاروں اربن فلڈنگ جبکہ مری، گلیات تے پہاڑی علاقیاں وِچ لینڈ سلائیڈنگ دا خدشہ اے، فیصل آباد، جھنگ، ٹوبہ ٹیک سنگھ، لیہ، بھکر، ساہیوال، پاکپتن، بہاولنگر، بہاولپور تے ڈی جی خان وِچ ۲۰ تے ۲۱ اگست نوں بارش دا امکان اے۔
محکمہ موسمیات دے مطابق وادیِ نیلم، مظفر آباد، راولاکوٹ، پونچھ، ہٹیاں، باغ، حویلی، سدھنوتی پلندری، کوٹلی، بھمبر تے میرپور وِچ اکثر تھاواں اُتے وقفے وقفے نال گرج چمک نال بارش دا امکان اے۔ خیبر پختونخوا وِچ دیر، چترال، سوات، کوہستان، مالاکنڈ، نوشہرہ، چارسدہ، صوابی، شانگلہ، بٹگرام، بونیر، کوہاٹ، ہنگو، کرم، باجوڑ، مہمند، خیبر، اورکزئی، مانسہرہ، ایبٹ آباد، ہری پور، پشاور تے مردان وِچ تیز ہواواں تے گرج چمک نال بارش جبکہ کچھ تھاواں اُتے موسلادھار بارش دا امکان اے۔ گلگت بلتستان، مری، گلیات تے کشمیر وِچ لینڈ سلائیڈنگ دا خدشہ اے۔ تربیلا ڈیم اپنی آخری حد تیکر بھر گیا جبکہ منگلا ڈیم وِچ پانی دی سطح ۶۸ فیصد تیکر پہنچ گئی اے۔ دریائے سندھ وِچ تربیلا، کالاباغ، چشمہ تے تونسہ دے مقاماں اُتے نچلے درجے دے سیلاب دی صورتحال اے۔
