سینیٹ اجلاس اج، ۶۴ نکاتی ایجنڈا جاری، اہم بل شامل

قائمہ کمیٹیاں دیاں رپورٹاں تے مختلف شعبیاں نال متعلق قانون سازی پیش کیتی جائے گی؛ تجارتی خسارے، ریلوے کارکردگی، سیلابی صورتحال دے معاملات زیرِ غور آؤن گے

اسلام آباد (سید قیصر شاہ) ایوانِ بالا دا اجلاس اج شام ۴ وجے چیئرمین سینیٹ سید یوسف رضا گیلانی دی صدارت وِچ ہووے گا۔ ڈیڑھ مہینے توں بعد ہون والے اجلاس دا ۶۴ نکاتی ایجنڈا جاری کر دتا گیا جیہدے وِچ اہم نجی بل، قرار داداں تے قومی امور زیرِ غور آؤن گے۔ سینیٹ سیکرٹریٹ دے مطابق اجلاس وِچ قائمہ کمیٹیاں دیاں مختلف بلان اُتے رپورٹاں پیش کیتیاں جان گیاں جبکہ متعدد نجی بل وی زیرِ غور آؤن گے۔ اوہناں وِچ آئینی ترمیم، ڈسپوزایبل سرنجاں دے استعمال، پاکستان پینل کوڈ، ضابطہ فوجداری تے صنعتی تعلقات ایکٹ وِچ ترامیم شامل نے۔ قومی اسمبلی توں منظور ہو کے سینیٹ نوں بھجوایا گیا انسدادِ زیادتی قانون وِچ ترمیم دا بل وی منظوری لئی پیش کیتا جائے گا۔

درآمدات تے برآمدات، خصوصی ٹیکنالوجی زونز، سول سرونٹس، انتخابات، فوجداری قوانین تے پاسپورٹس ایکٹ نال متعلق ترامیمی بل وی ایجنڈے دا حصہ نے۔ اجلاس وِچ کچھ نجی بل واپس لین دیاں درخواستاں وی پیش ہون گیاں۔ ایہدے علاوہ مذہبی رہنماواں، دینی مدارس دے استاداں تے خطبا لئی انسانی حقوق، سماجی انصاف تے برداشت نال متعلق تربیتی پروگرام وضع کرن دی سفارش پیش کیتی جائے گی۔ داسو ہائیڈرو پاور منصوبے توں متاثرہ خانداناں تے مقامی آبادی دی ترقی لئی اقدامات دی قرار داد وی پیش ہووے گی جبکہ شہید گروپ کیپٹن عاصم طارق نوں خراجِ عقیدت پیش کیتا جائے گا۔

اجلاس وِچ زچگی دے دوران موتاں، بالخصوص بعد از زچگی شدید خون بہن، بینظیر انکم سپورٹ پروگرام وِچ مبینہ بے ضابطگیاں تے مون سون سیلاب نال نمٹن دیاں تیاریاں اُتے بحث ہووے گی۔ ودھدے تجارتی خسارے، پاکستان ریلوے دی کارکردگی، مالی تے انتظامی مشکلات، خستہ حال ٹریکاں تے ٹرین آپریشنز دی سکیورٹی وی ایجنڈے وِچ شامل اے