سرگودھا دے ۲۱ نوجوان سعودی عرب وِچ لاپتا ہو گئے
قانونی طور اُتے سعودی عرب گئے، ٹیکسی ڈرائیوراں دے طور اُتے کم کر رہے سن؛ ۲۸ جنوری توں اہلخانہ نال رابطہ منقطع؛ اِکّو قبیلے دے ۱۳ نوجوان وی شامل؛ فیلڈ مارشل، وزیرِ اعظم تے وزیرِ خارجہ بازیابی وِچ کردار ادا کرن: اہلخانہ دی اپیل
ساہیوال، سرگودھا (نمائندہ دنیا) تحصیل ساہیوال سمیت مختلف علاقیاں توں تعلق رکھن والے ۲۱ پاکستانی نوجواناں دے سعودی عرب وِچ مبینہ طور اُتے لاپتا ہون دے معاملے اُتے لواحقین نے شدید تشویش دا اظہار کردے ہوئے حکومتِ پاکستان توں فوری مداخلت دا مطالبہ کیتا اے۔ گزشتہ روز ایس حوالے نال اِک احتجاجی اجتماع منعقد کیتا گیا جیہدے وِچ مختلف مکاتبِ فکر نال تعلق رکھن والے افراد نے شرکت کیتی، شرکا نے حکومت توں مطالبہ کیتا کہ لاپتا افراد دی بازیابی لئی فوری سفارتی اقدامات کیتے جان۔
لواحقین دے مطابق تمام نوجوان روزگار دے سلسلے وِچ ویزیاں اُتے سعودی عرب گئے سن تے اوتھے ٹیکسی ڈرائیوراں دے طور اُتے کم کر رہے سن، اوہناں دا ۲۸ جنوری توں اہلخانہ نال رابطہ منقطع اے۔ اہلخانہ دا کہنا اے کہ لاپتا نوجواناں نال لمے عرصے توں رابطہ نہ ہون پاروں شدید تشویش وِچ مبتلا نے، لاپتا افراد وِچ اِکّو قبیلے نال تعلق رکھن والے ۱۳ افراد وی شامل نے۔
لواحقین نے دَسیا کہ لاپتا نوجواناں وِچ مجتبیٰ بلوچ، رضی خان، محمد خاور اقبال تے ہور شامل نے، اوہناں نے فیلڈ مارشل، وزیرِ اعظم پاکستان تے وزیرِ خارجہ توں معاملے دا نوٹس لین تے سعودی حکام نال رابطہ کر کے نوجواناں دی بازیابی وِچ کردار ادا کرن دی اپیل کیتی اے۔
اوہناں دا کہنا سی کہ جے لاپتا افراد توں کوئی جرم سرزد ہویا اے تاں اوہناں نوں ایس بارے ثبوت فراہم کیتا جائے، تاہم جے اوہ کسی جرم وِچ ملوث نہیں تاں اوہناں دی فوری بازیابی لئی اقدامات کیتے جان۔
