جان بچاؤن والیاں ۵۲ نویاں دواواں دیاں قیمتاں ایسے مہینے مقرر ہون گیاں
وزیرِ اعظم نال وزیرِ صحت، خزانہ تے سی ای او ڈریپ دی اج ملاقات متوقع
اسلام آباد (این این آئی) جان بچاؤن والیاں ۵۲ نویاں دواواں دیاں قیمتاں ایسے مہینے مقرر ہون دا امکان اے، نجی ٹی وی نے ذرائع دے حوالے نال دَسیا کہ وزیرِ اعظم شہباز شریف نال وزیرِ صحت تے ڈریپ حکام دی ملاقات طے پا گئی۔
ذرائع دے مطابق وزیرِ اعظم شہباز شریف نال وزیرِ صحت، خزانہ تے سی ای او ڈریپ دی اج ملاقات متوقع اے، ایس اہم ملاقات وِچ ہارڈ شپ کیسز تے ۵۲ نویاں دواواں دیاں قیمتاں اُتے بریفنگ دتی جائے گی۔
ذرائع دے مطابق مذکورہ حکام دا وزیرِ اعظم نال ملاقات دا مقصد ۵۲ دواواں تے ہارڈ شپ کیسز اُتے حمایت حاصل کرنا اے۔
جیہناں بیماریاں دیاں نویاں دواواں دی منظوری دتی گئی اے، اوہناں وِچ کینسر، شوگر، ہیموفیلیا، آٹو ایمیون ڈس آرڈر، انتہائی نگہداشت، سنگین انفیکشن، امراضِ خون تے ہنگامی علاج وِچ استعمال ہون والیاں دواواں شامل نے۔
ڈریپ پالیسی بورڈ تے پرائسنگ کمیٹی ۵۲ نویاں دواواں دی منظوری دے چکی اے جبکہ کیبنٹ ڈرگ پرائسنگ کمیٹی نے ۲۴ جولائی نوں ۵۲ نویاں دواواں دی منظوری دتی سی۔ ذرائع نے دَسیا کہ مختلف بیماریاں دیاں ۱۰۰ دے نیڑے دواواں دے ہارڈ شپ کیسز زیرِ التوا نے۔ کابینہ توں منظوری ملن اُتے ڈریپ نویاں دواواں دا نوٹیفکیشن جاری کرے گی۔
