پی ٹی آئی دا ۲۷ ستمبر دا احتجاج وی ناکام ہووے گا: رانا تنویر
کے پی حکومت دے نال این ایف سی فنڈز دے معاملے جلد ٹھیک ہو جان گے، جماعتِ اسلامی محض سیاسی پاور شو کردی اے: وفاقی وزیرِ خوراک دی میڈیا نال گل بات
کالا شاہ کاکو (نامہ نگار) وفاقی وزیر برائے قومی غذائی تحفظ و تحقیق رانا تنویر حسین نے کہیا اے کہ میاں نواز شریف نے ہمیشہ مثبت سیاست دی بات کیتی اے تے اوہ سٹیٹس مین نے، اوہناں نے گالم گلوچ دی سیاست نوں ختم کیتا، سیاست نوں عبادت سمجھ کے کام کردے نے۔
میڈیا نال گل بات کردے ہوئے اوہناں نے کہیا کہ سیاسی جماعتاں نوں ذاتیات دی بجاے تنقید برائے اصلاح کرنی چاہیدی اے جیہدے توں جمہوریت دا پتہ چلے۔ اوہناں نے کہیا کہ جدوں تک فتنۃ ہندوستان دے خوارج تے بھارتی شر انگیزی دے اِک اِک فرد نوں ساڈیاں افواجِ پاکستان جہنم واصل نہیں کرن گیاں تدوں تک دہشت گرداں دے خلاف بلا تعطل آپریشن جاری رہے گا۔
وفاقی وزیر نے اِک سوال دے جواب وِچ کہیا کہ کے پی حکومت دے نال این ایف سی فنڈز دے معاملے جلد ٹھیک ہو جان گے، وزیراعلیٰ خیبر پختونخوا دے سیاسی بیان بانی پی ٹی آئی نوں خوش کرن لئی نے، پی ٹی آئی نے پہلاں بھی ناکام تحریکاں چلائیاں نے تے ہن ۲۷ ستمبر دی تحریک بھی ناکام ہووے گی۔ اوہناں نے کہیا ستمبر وِچ فر ہڑھ (سیلاب) دی پیشگی اطلاعواں نے جیہدے لئی مؤثر انتظام کیتے جا رہے نے۔ اوہناں نے کہیا جماعتِ اسلامی سمیت سبھ نوں پتہ اے کہ ملکی معاملے کس طرحاں چلدے نے، ایہ بس اپنا سیاسی پاور شو کردے تے دھرنے دیندے نے۔
