اسرائیل دی مخالفت غزہ منصوبے اُتے براہِ راست حملہ قرار

مسلسل انکار اتے رکاو اں دے تمام نتائج دی براہِ راست ذمے داری اسرائیل اتے ہوسی، امریکہ عملدرآمد یقینی بݨاوے، پاکستان سمیت 8 اسلامی ممالک دا مشترکہ اعلامیہ،

ریاض، اسلام آباد (اے ایف پی، وقائع نگار): پاکستان سمیت 8 اسلامی ممالک نے اسرائیل دی جانب توں غزہ منصوبے کوں مسترد کرݨ دے عمل دی مخالفت کر ݙتی ہے، ترجمان دفتر خارجہ دے مطابق پاکستان سمیت 8 اسلامی ممالک نے غزہ منصوبے اتے فلسطینی ریاست نال متعلق مشترکہ اعلامیہ جاری کر ݙتا ہے، پاکستان، مصر، ترکیہ، انڈونیشیا، اردن، قطر، سعودی عرب اتے متحدہ عرب امارات نے مشترکہ مؤقف اپنائندیں ہوئیں اسرائیلی اقدام دی مخالفت کیتی، اعلامیہ دے مطابق اسرائیل دا مؤقف غزہ جامع منصوبے اتے براہِ راست حملے اتے امن کوششاں کوں نقصان پچاوݨ دے مترادف ہے، اسرائیل غزہ اتے مقبوضہ فلسطینی علاقیاں وچ امن دی راہ روکݨ دا ذمے دار ہے، غزہ روڈ میپ کوں فلسطینی دھڑکاں نے قبول کیتا ہے، مشترکہ اعلامیہ وچ زور ݙتا گیا جو روڈ میپ وچ اسرائیلی فوج دا انخلا، عالمی استحکامی فورس دی تعیناتی اتے غزہ دی تعمیرِ نو اتے عملدرآمد کروایا ونڄے، اسرائیل دے روڈ میپ مسترد کرݨ نال جامع منصوبے اتے عملدرآمد خطرے وچ پے گیا، امریکہ اسرائیل توں جامع منصوبے اتے روڈ میپ اتے مکمل عملدرآمد یقینی بݨاوے، اسرائیل دے مسلسل انکار اتے رکاوٹاں دے تمام نتائج دی براہِ راست ذمے داری اسرائیل اتے عائد ہوسی، غزہ وچ انسانی بحران دے خاتمے کیتے جامع منصوبے اتے فوری اتے مکمل عملدرآمد ناگزیر ہے، اعلامیہ وچ فلسطینی عوام دے حقِ خودارادیت اتے آزاد ریاست دے قیام دی حمایت دا اعادہ کیتا گیا اتے فلسطینی ریاست دے حق کوں یکطرفہ اقدامات دے ذریعے ختم کرݨ دی ہر کوشش مسترد کیتی گئی، اعلامیہ وچ بورڈ آف پیس دا کردار جاری رکھݨ اتے روڈ میپ اتے عملدرآمد کیتے کوششاں تیز کرݨ اتے زور ݙتا گیا اتے آکھیا گیا جو بورڈ آف پیس امریکہ دی فعال حمایت نال جامع منصوبے دے تحفظ کیتے فوری اقدامات کرے۔