وفاقی حکومت دا اپوزیشن نال رابطہ: اعظم تارڑ، رانا ثناء اللہ، طارق فضل دی محمود اچکزئی تے علامہ ناصر عباس نال ملاقات، اج پیپلز پارٹی دے رہنما اپوزیشن لیڈر نال ملن گے

وزیراعظم دی اپوزیشن لیڈر نال ملاقات لئی تھاں طے کرن تے گل ہوئی، خط دا جواب دتا جاوے گا، رابطے جاری رکھن تے اتفاق ہویا: طارق فضل، کوئی گلا شکوہ نہیں: رانا ثناء اللہ، ملاقات توں بعد میڈیا نال گفتگو۔ نائب وزیراعظم اسحاق ڈار دی قیادت وچ ن لیگی رہنماواں دی چیئرمین تحریک انصاف بیرسٹر گوہر دے گھر آمد، والدہ دے انتقال تے تعزیت، سیاسی اختلافات صرف سیاسی میدان تک محدود: وفاقی وزیر۔

اسلام آباد (نیوز ایجنسیاں، مانیٹرنگ ڈیسک) وفاقی وزیر قانون اعظم نذیر تارڑ، وزیر پارلیمانی امور طارق فضل تے مشیر سیاسی امور رانا ثناء اللہ تے مشتمل حکومتی وفد نے محمود خان اچکزئی تے علامہ ناصر عباس نال ملاقات کیتی، جبکہ پیپلز پارٹی دے رہنما اپوزیشن لیڈراں نال اج ملن گے۔ پارلیمنٹ ہاؤس وچ حکومتی وفد نے محمود خان اچکزئی نال انہاں دے چیمبر وچ ملاقات کیتی، ایس دوران سینیٹ وچ اپوزیشن لیڈر علامہ ناصر عباس وی شریک ہوئے، ملاقات وچ اپوزیشن لیڈر ولوں چیف الیکشن کمشنر تے 2 ممبراں دی تعیناتی لئی وزیراعظم نوں لکھے گئے خط تے وزیراعظم تے اپوزیشن لیڈر دے درمیان ممکنہ ملاقات تے مشاورت کیتی گئی۔ ملاقات خوشگوار ماحول وچ ہوئی تے دوناں دھراں درمیان مختلف معاملیاں تے فائدے مند گل بات ہوئی۔ ملاقات دوران ملکی سیاسی صورتحال، حکومت تے اپوزیشن درمیان رابطیاں تے آئینی و سیاسی معاملیاں سمیت آپسی دلچسپی دے معاملیاں تے گفتگو کیتی گئی۔

ملاقات توں بعد میڈیا نال گفتگو کردے ہوئے رانا ثناء اللہ نے کہا کہ کوئی گلا شکوہ نہیں، وزیراعظم خط دا جواب دے رہے نے ایس تے بات چیت ہوئی۔ طارق فضل نے دَسیا کہ محمود خان اچکزئی نے وزیراعظم شہباز شریف نوں اک آئینی مشاورتی خط بھیج رکھیا اے، جس دے حوالے نال ملاقات وچ بات چیت ہوئی۔ انہاں نے کہا کہ محمود خان اچکزئی نال ہون والی ملاقات خوشگوار ماحول وچ ہوئی تے ایس وچ فائدے مند گفتگو کیتی گئی۔ انہاں دے مطابق حکومت تے اپوزیشن درمیان بات چیت دا سلسلہ جاری رکھن تے وی اتفاق رائے پایا گیا۔ طارق فضل چوہدری نے دَسیا کہ ملاقات دوران وزیراعظم شہباز شریف تے اپوزیشن لیڈر محمود خان اچکزئی درمیان ممکنہ ملاقات لئی تھاں طے کرن دے حوالے نال وی بات ہوئی۔ انہاں نے کہا کہ وزیراعظم نوں ایس ملاقات دے حوالے نال دَسیا جاوے گا، محمود خان اچکزئی ولوں وزیراعظم نوں بھیجے گئے خط دا جواب وی دتا جاوے گا۔ انہاں دے مطابق حکومت تے اپوزیشن درمیان رابطے قائم رہیں گے تے بات چیت دا ایہ سلسلہ اگے وی جاری رکھیا جاوے گا۔

ملاقات وچ اپوزیشن لیڈر سینیٹ علامہ ناصر عباس دی موجودگی وی اہم رہی۔ ایس موقعے تے سیاسی معاملیاں نوں آپسی مشاورت تے مذاکرات راہیں اگے ودھاون دے حوالے نال مختلف پہلوآں تے گل بات ہوئی۔ ذرائع دے مطابق وزیراعظم تے اپوزیشن لیڈر درمیان ممکنہ ملاقات حکومت تے اپوزیشن درمیان جاری رابطہ کاری نوں مزید اگے ودھاون وچ اہم پیش رفت ثابت ہو سکدی اے۔ دھراں درمیان آئینی تے سیاسی معاملیاں تے مشاورت دا سلسلہ اگے وی جاری رہن دا امکان اے۔ طارق فضل چوہدری نے واضح کیتا کہ حکومت اپوزیشن نال رابطے تے بات چیت دا سلسلہ جاری رکھے گی تے محمود خان اچکزئی دے آئینی مشاورتی خط تے وزیراعظم نوں باضابطہ طور تے دسن توں بعد جواب وی دتا جاوے گا۔

ایس دے نال ای نائب وزیراعظم و وزیر خارجہ اسحاق ڈار دی قیادت وچ مسلم لیگ (ن) دے اعلیٰ سطح دے وفد نے چیئرمین پی ٹی آئی بیرسٹر گوہر علی خان دے گھر جا کے انہاں دی والدہ دے انتقال تے تعزیت کیتی۔ وفاقی وزیر پارلیمانی امور ڈاکٹر طارق فضل چوہدری دے میڈیا آفس دے مطابق وفد وچ وفاقی وزراء رانا ثناء اللہ، ڈاکٹر طارق فضل چوہدری تے صدر (ن) لیگ آزاد کشمیر شاہ غلام قادر، سینیٹر انوشہ رحمن، ایم این اے انجم عقیل خان تے ہور اہم رہنما شامل سن۔ ڈاکٹر طارق فضل چوہدری نے کہا اے کہ مسلم لیگ ن دے وفد نے چیئرمین پی ٹی آئی بیرسٹر گوہر نال انہاں دی والدہ دے انتقال تے تعزیت کیتی۔ وفد نے مرحو مہ دی مغفرت، درجات دی بلندی تے سوگوار خاندان لئی صبرِ جمیل دی دعا وی کیتی۔ انہاں نے کہا وزیراعظم شہباز شریف نے وفد بھیج کے واضح پیغام دتا کہ سیاسی اختلافات صرف سیاسی میدان تک محدود نے۔

ایس توں علاوہ پیپلز پارٹی دا وفد اج منگل والے دن اپوزیشن لیڈر محمود خان اچکزئی نال ملاقات کرے گا۔ ذرائع دے مطابق وفد وچ راجہ پرویز اشرف، نوید قمر، شیری رحمن تے سلیم مانڈوی والا شامل ہون گے۔ ذرائع دے مطابق ملاقات وچ ملک دی سیاسی صورتحال، پارلیمانی تے ہور اہم معاملیاں تے مشاورت کیتی جاوے گی، جمہوری اداریاں نوں موثر تے مضبوط بنان لئی آپسی تعاون، مشترکہ حکمت عملی تے مشاورت کیتی جاوے گی۔ ملاقات وچ پیپلز پارٹی تے اپوزیشن درمیان پارلیمان دے اندر تے باہر مشترکہ جدوجہد تے وی مشاورت کیتی جاوے گی۔