ٹرمپ دی مکہ معاہدے دی حمایت تے حوصلہ افزائی دا شکریہ: خطے دے دفاع لئی کردار ادا کردے رہاں گے: شہباز شریف

پائیدار امن ای ساڈیاں قوماں دے روشن تے خوشحال مستقبل لئی سب توں اہم بنیادی شرط: وزیراعظم۔ اسلام آباد ٹیکنالوجی پارک وچ تاخیر تے اظہارِ برہمی، جلد تکمیل، چلاون لئی ایس نوں آؤٹ سورس کرن دی ہدایت۔

اسلام آباد (نامہ نگار) وزیراعظم شہباز شریف نے کہا امریکی صدر ڈونلڈ ٹرمپ ولوں مکہ مکرمہ مشترکہ دفاعی معاہدے تے دستخط دے حوالے نال حمایت تے حوصلہ افزائی دا شکریہ ادا کردے نے، برادر ملک سعودی عرب تے جمہوریہ ترکیہ نال مل کے پاکستان پورے خطے دے دفاع تے سلامتی نوں یقینی بنان وچ تعمیری کردار ادا کردا رہے گا۔ ”ایکس” تے اپنے پیغام وچ وزیراعظم نے کہا اک وار پھر صدر ٹرمپ دی جرأت مندانہ تے فیصلہ کن قیادت نوں خراجِ تحسین پیش کردے نے جس نے جنوبی ایشیا وچ جوہری تباہی نوں ٹالن تے لکھاں انسانی جاناں نوں بچان وچ مدد دتی، پائیدار امن ای ساڈیاں قوماں دے روشن تے خوشحال مستقبل لئی سب توں اہم بنیادی شرط اے۔ واضح رہے کہ صدر ٹرمپ نے سوشل میڈیا پلیٹ فارم تے اپنے بیان وچ کہا سی کہ انہاں نوں بہت خوشی اے کہ سعودی عرب، ترکی تے پاکستان نے ”مکہ مکرمہ مشترکہ دفاعی معاہدے” تے دستخط کر دتے نے۔ انہاں نے ایس نوں بہت بڑا، جرأت مندانہ تے پہلا اہم قدم قرار دندے ہوئے کہا سی کہ ایس معاہدے توں واضح ہو رہا اے کہ مشرق وسطیٰ دے ملک کس طرح اک دوجے دے قریب آ رہے نے تے کس طرح وہ اپنا دفاع زیادہ بہتر طریقے نال کرن دے قابل ہون گے۔

ایس توں علاوہ شہباز شریف نے نیشنل انفارمیشن ٹیکنالوجی بورڈ وچ جاری اصلاحات تے اسلام آباد ٹیکنالوجی پارک دی تعمیر دی پیشرفت دے حوالے نال جائزہ اجلاس دی صدارت کیتی۔ وزیراعظم نے اسلام آباد ٹیکنالوجی پارک دی تکمیل وچ تاخیر تے اظہارِ برہمی کردے ہوئے اسلام آباد ٹیکنالوجی پارک دی تعمیر نوں جلد توں جلد مکمل کرن تے ٹیکنالوجی پارک نوں ترجیحی بنیاداں تے فعال کرن دی ہدایت کیتی۔ انہاں نے کہا کہ اسلام آباد ٹیکنالوجی پارک نوں چلاون لئی مکمل طور تے آؤٹ سورس کیتا جاوے۔ انہاں نے کہا شہریاں نوں بروقت، شفاف تے آسان ڈیجیٹل خدمات دی فراہمی لئی تمام متعلقہ ادارے مربوط انداز وچ کام کرن۔ شہریاں نوں سرکاری خدمات دے حصول وچ سہولت فراہم کرنا حکومت دی ترجیح اے۔

انہاں نے کہا کہ آئی ٹی تے ڈیجیٹل اصلاحات وچ وفاقی وزارتاں دی ای آفس تے منتقلی ہن تک دی اہم ترین اصلاحات وچوں اے۔ وزیراعظم نے وفاقی حکومت دے تمام ماتحت اداریاں تے ایس او ایز وچ ای آفس دا استعمال یقینی بنان، سرکاری اداریاں دی ڈیجیٹلائزیشن دے عمل نوں تیز کرن، جدید ٹیکنالوجی توں بھرپور استفادہ کرن تے تمام سرکاری املاک دے ریکارڈ دی ڈیجیٹائزیشن جلد توں جلد مکمل کرن دی ہدایت کیتی۔ بریفنگ وچ دَسیا گیا کہ این آئی ٹی بی دی رائٹ سائزنگ کیتی جا چکی اے تے اہم عہدیاں تے تعیناتی اک شفاف طریقے نال کیتی جا رہی اے۔ تمام وفاقی وزارتاں ای آفس تے منتقل ہو چکیاں نے جبکہ دوجے محکمیاں تے سرکاری ملکیتی اداریاں وچ ایس دی ترویج تے کام جاری اے۔