پنجاب دے عوام نوں صاف پانی گھر گھر پہنچا کے دم لواں گے: مریم نواز

وزیراعلیٰ دی زیر صدارت اجلاس، راجن پور، جام پور تے داجل وچ واٹر سپلائی پائلٹ پراجیکٹ دا جائزہ، پانی دی قلت دے شکار چکوال دے 8 پنڈاں وچ ترجیحی بنیاد تے واٹر سپلائی تے اتفاق۔

لاہور (سٹاف رپورٹر) وزیراعلیٰ مریم نواز شریف دی زیر صدارت صاف پانی دی فراہمی لئی مسلسل پنجواں اجلاس منعقد ہویا جس وچ متعلقہ حکام تے ڈپٹی کمشنراں نے ویڈیو لنک راہیں شرکت کیتی۔ اجلاس وچ چکوال، راولپنڈی، راجن پور، فیصل آباد، مری تے اٹک دے اضلاع وچ واٹر سپلائی پائپ لائن پراجیکٹ دا جائزہ لیا گیا۔ ایس موقعے تے پین دے صاف پانی دی فراہمی لئی تجویز کردہ اقداماں دا جائزہ لیا گیا۔ اجلاس وچ پانی دی قلت دے شکار چکوال دے 8 پنڈاں وچ ترجیحی بنیاد تے واٹر سپلائی تے اتفاق کیتا گیا۔ راجن پور، جام پور، چک شگاری تے داجل وچ واٹر سپلائی پائلٹ پراجیکٹ دی تجویز دا جائزہ لیا گیا۔ ایس موقعے تے چک جھمرہ تے فیصل آباد دے مضافاتی علاقیاں وچ پین دے پانی دی فراہمی لئی پائلٹ پراجیکٹ تے اتفاق کیتا گیا۔ وزیراعلیٰ مریم نواز شریف نے آبادی دے مطابق پانی دی ضرورت دا مستند ڈیٹا مرتب تے تصدیق کرن دی ہدایت کیتی۔ وزیراعلیٰ مریم نواز شریف نے راجن پور وچ فوری طور تے 21 باؤزر مہیا کرن دی ہدایت کیتی تے روجھان وچ بیوٹیفکیشن تے ہور پراجیکٹ لیاون دا وی حکم دتا۔ وزیراعلیٰ نے مری وچ پین دے پانی دی فراہمی لئی واٹر ٹینک مہیا کرن دا حکم دتا تے مری وچ نویں واٹر سورس تے کام کرن دی ہدایت کیتی۔

اجلاس وچ پنجاب صاف پانی اتھارٹی تے ڈپٹی کمشنراں نے متعلقہ علاقیاں توں متعلق تفصیلی بریفنگ وچ دَسیا کہ چکوال وچ 32 واٹر فلٹریشن پلانٹس موجود، 237 زیر تعمیر تے 15 مثالی پنڈ تے 13 ماڈل ویلیج بنائے جا رہے نے۔ راولپنڈی وچ 246 واٹر فلٹریشن پلانٹ موجود جبکہ 252 فلٹریشن پلانٹ نویں لگائے جان گے۔ اٹک وچ 77 واٹر فلٹریشن پلانٹ موجود، 399 زیر تکمیل تے 9 مثالی پنڈ بنائے جان گے۔ بریفنگ وچ مزید دَسیا گیا کہ راجن پور وچ 146 واٹر فلٹریشن پلانٹ موجود، 191 زیر تکمیل، 12 مثالی پنڈ تے اک ماڈل ویلیج بنے گا۔ مری وچ پنج واٹر فلٹریشن پلانٹ موجود، 90 زیر تکمیل نے۔ فیصل آباد وچ 343 واٹر فلٹریشن پلانٹ موجود جبکہ 4 سرفیس واٹر ٹریٹمنٹ پلانٹ تے 180 زیر تکمیل نے۔ مریم نواز شریف نے کہا کہ عوام نوں پین دا صاف پانی پہنچاون دا عزم غیر متزلزل اے۔ پنجاب دے عوام نوں پین دا صاف پانی گھر گھر پہنچا کے دم لواں گے۔ پورے پنجاب وچ جہاں لوگ موڈھے تے رکھ کے پانی لیاون تے مجبور نے، وہی علاقے ترجیحاں وچ شامل نے۔ پورے پنجاب وچ پانی دی فراہمی اپنی ذمہ داری سمجھدی ہاں، کیونکہ عوام دی خدمت میرا فرض اے۔