مطالبات دی منظوری تک سڑکاں توں نہیں اٹھاں گے: حافظ نعیم
حکمران آئی ایم ایف دے غلام بن چکے، نظام دی ناکامی دا اعتراف ہو رہا، افسر شاہی خود نوں حاکم سمجھنا بند کرے: خطاب، مہنگی بجلی، پٹرولیم لیوی خلاف جماعت اسلامی دے دھرنے دوجے دہاڑے وی جاری، شرکا بڑی تعداد وچ موجود۔
لاہور امیر جماعت اسلامی پاکستان حافظ نعیم الرحمن نے حکمراناں نوں دو ٹوک پیغام دتا اے کہ پٹرولیم لیوی دے خاتمے سمیت دوجے مطالبات منظور ہون تک سڑکاں توں نہیں اٹھاں گے۔ لاہور، کراچی، پشاور دے دھرنے پچی کروڑ عوام دی نمائندگی کر رہے نے۔ حکمران آئی ایم ایف دے غلام بن گئے، نظام دی ناکامی دا اعتراف ہو رہا اے، افسر شاہی خود نوں حاکم سمجھنا بند کرے۔ انہاں خیالات دا اظہار انہاں نے وزیراعلیٰ ہاؤس دے باہر دھرنے دی تھاں تے پریس کانفرنس توں خطاب کردے ہوئے کیتا۔ پٹرولیم لیوی، مہنگی بجلی تے آئی پی پیز دے معاہدیاں خلاف جماعت اسلامی دا احتجاج دوجے دہاڑے وچ داخل ہو گیا اے۔ شدید گرمی دے باوجود لاہور دے چیئرنگ کراس تے ہزاراں بندیاں دا دھرنا بدستور جاری اے۔ شرکا نے رات مال روڈ تے گزاری تے حکومت خلاف مسلسل نعرے لائے گئے۔ شرکا نے اعلان کیتا اے کہ پٹرول 225 روپے فی لٹر، پٹرولیم لیوی دا خاتمہ تے بجلی سستی ہون تک دھرنا ختم نہیں ہووے گا۔ ایسے دوران کراچی تے پشاور دے گورنر ہاؤسز دے باہر وی جماعت اسلامی دے دھرنے جاری نے۔ امیر جماعت اسلامی نے عوام توں اپیل کیتی کہ اوہ بڑی تعداد وچ گھراں توں نکلن تے احتجاج وچ شریک ہون۔
انہاں نے کہا کہ پٹرول دی ایکس ریفائنری قیمت تقریباً 195 روپے فی لٹر اے، غریب صارف توں مختلف ٹیکساں تے لیوی دی صورت وچ فی لٹر تقریباً 130 روپے اضافی وصول کیتے جا رہے نے۔ ایف بی آر دی کارکردگی تے وی سوال اٹھاندے ہوئے امیر جماعت اسلامی نے کہا کہ ادارے وچ سالانہ 1300 ارب روپے دی کرپشن ہوندی اے، مگر اوہدی خامیاں دور کرن دی بجائے حکومت عوام تے مزید بوجھ پا رہی اے۔ جاگیرداراں تے وڈیریاں نے مجموعی طور تے صرف 12 ارب روپے ٹیکس ادا کیتا جبکہ تنخواہ دار طبقے توں سالانہ 700 ارب روپے انکم ٹیکس وصول کیتا گیا۔ حافظ نعیم الرحمن نے کہا کہ 79 ورھیاں توں اک مخصوص طبقہ مختلف حکومتاں دی شکل وچ عوام تے مسلط اے، ہن حکمران خود نظام دی ناکامی دا اعتراف کرن تے مجبور نے، افسر شاہی عوام نوں غلام تے خود نوں حاکم سمجھدی اے۔ حکومت ولوں مذاکرات لئی کمیٹی قائم کرن دے پیغام تے انہاں نے واضح کیتا کہ جماعت اسلامی اسلام آباد جا کے کسے کمیٹی نال گل نہیں کرے گی، جس نے گل کرنی اے، اوہ اتھے آوے، اسیں اوہنویں عزت دیاں گے تے مذاکرات کراں گے۔ انہاں نے کہا کہ جماعت اسلامی پرامن احتجاج کر رہی اے تے ایہ اوہدا آئینی حق اے۔
