عمران خان دی صحت تے سیاست نہ کیتی جاوے: پرویز الٰہی

اوہناں نوں فوری ہسپتال منتقل کر کے اوہناں دیاں اکھاں تے بلڈ پریشر دا علاج کرایا جاوے: پرویز الٰہی دی بیرسٹر گوہر دی رہائش گاہ آمد، والدہ دی وفات تے تعزیت تے فاتحہ خوانی

لاہور پاکستان تحریکِ انصاف دے صدر چودھری پرویز الٰہی اپنے صاحبزادے راسخ الٰہی دے نال پی ٹی آئی دے چیئرمین بیرسٹر گوہر علی خان دی رہائش گاہ تے گئے تے اوہناں دی والدہ دے انتقال تے ڈوہنگھے دکھ تے افسوس دا اظہار کیتا۔ سابق چیئرمین شکایت سیل زبیر خان، فیاض تبسم تے دوجے وی اوہناں دے نال سن، چودھری پرویز الٰہی نے مرحومہ دے ایصالِ ثواب لئی فاتحہ خوانی کیتی، بعد وچ میڈیا نال گفتگو کردے ہوئے چودھری پرویز الٰہی نے کہا عمران خان دی وگڑدی ہوئی صحت تے سانوں بہت تشویش اے، عمران خان دی صحت تے سیاست نہیں ہونی چاہیدی اوہناں نوں فی الفور ہسپتال شفٹ کر کے اوہناں دیاں اکھاں تے بلڈ پریشر دا علاج کروایا جاوے کیونکہ ایہناں بیماریاں توں ہی تمام بیماریاں شروع ہوندیاں نے، اوہناں نے مزید کہا ساڈی سوچ ہمیشہ توں مثبت رہی اے، ایہوجہے حالات ہون جس وچ سبھ نوں برابری دا چانس ملے تاکہ ملکی حالات وچ بہتری آوے۔