بھارت وچ گرفتار افراد نوں پاکستان نال جوڑنا پراپیگنڈا: دفترِ خارجہ

بھارت داخلی سکیورٹی دے مسائل توں توجہ ہٹان لئی الزام لگا رہیا اے: ترجمان، عالمی برادری بھارت دی ریاستی سرپرستی وچ ہون والی دہشت گردی دا احتساب کرے

اسلام آباد (مانیٹرنگ ڈیسک) دفترِ خارجہ نے بھارتی وزیرِ داخلہ ولوں بھارت وچ ہون والی بعض گرفتاریوں نوں پاکستان نال جوڑن دے الزامات نوں سختی نال مسترد کر دتا۔ ترجمان دفترِ خارجہ نے کہا اے کہ بھارتی وزیرِ داخلہ دے الزامات بے بنیاد نے، ایہوجہی پراپیگنڈا مہم پاکستان دے خلاف بھارت دی بدنیتی تے مبنی مہم دا اک ہور مظہر اے۔ ترجمان دفترِ خارجہ نے کہا کہ بھارت اپنی داخلی سکیورٹی دے مسائل توں توجہ ہٹان تے محدود سیاسی مفادات لئی پاکستان نوں موردِ الزام ٹھہران دی کوشش کر رہیا اے۔ دفترِ خارجہ دے ترجمان نے کہا کہ بھارت اندرونِ ملک اک جابرانہ ریاست اے جو اقلیتاں نوں سختی نال دباندا تے اختلافِ رائے نوں خاموش کرواندا اے، بیرونِ ملک دہشت گردی برآمد تے دہشت گردں دی معاونت کر رہیا اے۔

ترجمان دفترِ خارجہ نے کہا کہ بے بنیاد الزامات عالمی توجہ نوں بھارت دی ریاستی سرپرستی وچ ہون والی دہشت گردی، ٹارگٹ کلنگ تے بیرونِ ملک تخریبی سرگرمیاں توں نہیں ہٹا سکدے۔ پاکستان متعدد بار بھارت دے پاکستان وچ دہشت گردی تے عدمِ استحکام دی سرگرمیاں وچ ملوث ہون دے شواہد عالمی برادری نال شیئر کر چکا اے۔ دفترِ خارجہ نے کہا کہ بھارتی بحریہ دے کمانڈر تے پاکستان وچ دہشت گردی و تخریبی سرگرمیاں وچ ملوث ہون دے جرم وچ سزا یافتہ کلبھوشن یادیو بھارت دے براہِ راست ملوث ہون دا ناقابلِ تردید ثبوت نے۔ پاکستان نے عالمی برادری تے زور دتا کہ وہ بھارت دے بے بنیاد الزامات نوں مسترد کرے تے خطے وچ بھارت دی ریاستی سرپرستی وچ ہون والی دہشت گردی دا احتساب کرے۔