سندھ وچ نواں صوبہ نہیں بنن دیاں گے: صوبائی وزرا

اسیں چیف منسٹری قربان کر دیاں گے سندھ نوں تقسیم نہیں ہون دیاں گے: ناصر شاہ، تقسیم دیاں گلاں کرن والیاں نوں سندھ دے طول و عرض، حقائق دا علم نہیں: سعید غنی

کراچی (نیوز ایجنسیاں، مانیٹرنگ ڈیسک) سندھ دے وزرا ناصر حسین شاہ تے سعید غنی نے کہا اے کہ اوہ سندھ وچ نواں صوبہ نہیں بنن دین گے۔ وزیر بلدیات ناصر حسین شاہ نے ٹی وی پروگرام وچ کہا اسیں سندھ دی چیف منسٹری قربان کر دیاں گے لیکن سندھ نوں تقسیم نہیں ہون دیاں گے۔ اوہناں نے کہا سندھ دی تقسیم بڑا حساس معاملہ اے، ایم کیو ایم نے کئی بار کہا کہ سندھ دی تقسیم نال تفریق پیدا ہووے گی، سب لئی ایس نال لسانی مسائل ہون گے، ہاں! سندھ وچ گڈ گورننس تے بات ہو سکدی اے۔ وزیر محنت و افرادی قوت و سماجی تحفظ سندھ سعید غنی نے سکول دی افتتاحی تقریب وچ خطاب کردے ہوئے کہا جو مرضی کر لین میں لکھ کے دین نوں تیار آں سندھ دے اندر کوئی دوجا صوبہ نہیں بنے گا۔

اوہناں نے کہا بعض اوقات بہت حیرت ہوندی اے جدوں مختلف تجزیہ نگار تے تجزیہ کار صحافی بیٹھے ہوئے ایہہ کہندے نے کہ پیپلز پارٹی نہیں چاہندی کہ سندھ وچ صوبہ بنے تے ایس دی دلیل دیندے ہوئے ایہہ کہندے نے کہ پیپلز پارٹی کرپشن کردی اے، ایس طرح دی جاہلانہ تے بے وقوفی والی سوچ رکھن والیاں نوں اسیں کیہ کہہ سکدے آں، سندھ دی تقسیم کرن تے نویں صوبے بنان دیاں گلاں کرن والیاں نوں سندھ دے طول و عرض تے حقائق دا کچھ علم نہیں، اوہناں نے مزید کہا کراچی وچ دھرنے تے عوام نوں تکلیف دین نال شہباز شریف تے کیہ فرق پوے گا، امیر جماعت اسلامی حافظ نعیم الرحمن ایک پڑھے لکھے انسان نے، اوہناں توں گزارش اے کہ اوہ عقل نال کام لین۔