دلدلی زمین تے گھٹ ڈونگھے سمندر وچ اعلیٰ درجے دی گیس دریافت

پی پی ایل نے گھٹ ڈونگھائی والے سمندری علاقے وچ نویاں دریافتاں لئی رستہ ہموار کر دتا

کراچی (سٹاف رپورٹر) پاکستان پٹرولیم لمیٹڈ (پی پی ایل) نے ضلع سجاول، سندھ وچ واقع اپنے آپریٹڈ سرانی بلاک دے دریافتی کھوہ ڈولفن توں گیس دی اک منفرد تے اہم دریافت کیتی اے۔ ایہ جراسک دور دی لوئر انڈس بیسن دی چلتن فارمیشن توں ہائیڈروکاربن دی سب توں پہلی دریافت اے۔ پی پی ایل نے اک فعال پٹرولیم نظام دی موجودگی نوں ثابت کردے ہوئے دلدلی زمینی علاقیاں تے ایہدے متعلقہ گھٹ ڈونگھائی والے سمندری علاقے وچ ممکنہ نویاں دریافتاں لئی سرحد کھول دتی اے جس توں پاکستان دے گھٹ ڈونگھائی والے سمندری علاقیاں دی دریافتی صلاحیت وچ مزید اضافہ ہویا اے۔ پی پی ایل پہلی دریافتی و پیداواری کمپنی اے جس نے اس مشکل دلدلی خطے وچ جغرافیائی رکاوٹاں تے قابو پاندے ہوئے خصوصی ٹرانزیشن آلات کامیابی نال استعمال کیتے جنہاں دے ذریعے اہم 2ڈی تے 3ڈی سائزمک ڈیٹا حاصل کیتا۔ یوں اک غیر دریافت شدہ سرحدی علاقے نوں ثابت شدہ پٹرولیم پلے وچ تبدیل کر دتا گیا۔