بلوچستان: 100 کروڑ دی کرپشن، ڈپٹی ڈائریکٹر آبپاشی گرفتار

مقدمہ درج، سرکاری گڈیاں تے بھاری مشینری دی نیلامی دی تحقیقات جاری

کوئٹہ (مانیٹرنگ ڈیسک) اینٹی کرپشن بلوچستان نے محکمہ آبپاشی بلوچستان وچ 100 کروڑ روپے دی مبینہ کرپشن دا مقدمہ درج کر کے ڈپٹی ڈائریکٹر طلحہ بگٹی نوں گرفتار کر لیا اے۔ محکمہ آبپاشی بلوچستان وچ سرکاری گڈیاں تے بھاری مشینری دی مبینہ طور تے انتہائی گھٹ قیمت تے نیلامی دے معاملے دی تحقیقات جاری نے۔ محکمہ آبپاشی بلوچستان دی فروری تے اکتوبر 2024 وچ ہون والی دو نیلامیاں وچ 70 توں زائد زیرِ استعمال سرکاری گڈیاں تے بھاری مشینری نوں مبینہ طور تے انتہائی گھٹ قیمت تے فروخت کیتا گیا سی۔ نیلام ہون والی شیاں وچ لینڈ کروزر، ڈبل کیبن گڈیاں، ٹرک، ٹینکر، ڈمپر، ڈوزر، ٹریکٹر تے ایکسکیویٹر سمیت دوجی مشینری شامل سی۔

دستاویزات دے مطابق 2000 ماڈل دی اک لینڈ کروزر 3 لکھ 50 ہزار روپے، بعض ڈبل کیبن گڈیاں 3 توں 4 لکھ روپے، ٹویوٹا ہائی لکس دیاں بعض گڈیاں 2 لکھ 50 ہزار روپے، پیجیرو جیپاں اک لکھ 65 ہزار توں 2 لکھ روپے، ڈوزر 5 توں 9 لکھ روپے تے ٹریکٹر ڈیڑھ توں 2 لکھ روپے وچ نیلام کیتے گئے۔ اک ایکسکیویٹر 11 لکھ روپے جبکہ جنریٹراں سمیت اک ٹرک 10 لکھ روپے وچ فروخت کیتے جان دا انکشاف ہویا۔ دستاویزات دے مطابق متعدد گڈیاں تے مشینری نوں ناکارہ قرار دے کے نیلام کیتا گیا، جبکہ چیف انجینئر نے زیرِ استعمال گڈیاں دی نیلامی دی مخالفت کیتی سی۔ اینٹی کرپشن اسٹیبلشمنٹ بلوچستان نے دوواں نیلامیاں دا ریکارڈ حاصل کر کے تحقیقات شروع کر دتیاں نے۔