پنجاب: آٹے دا بحران، ۱۵ کلو دا تھیلا ۲۱۵۰ روپے تک اپڑ گیا۔
لاہور وچ روزانہ ۱۰ کلو دے اک لَکھ ۱۰ ہزار تھیلاں دی کمی، ۲۰ کلو وی لبھنا اوکھا ہو گیا۔
لاہور (عمران اکبر): لاہور سمیت پورے پنجاب وچ ۱۰ تے ۲۰ کلو آٹے دی سپلائی وچ کمی پاروں شہری مہنگا آٹا خریدن تے مجبور ہو گئے نیں، ۱۵ کلو آٹے دا تھیلا ۲ ہزار ۱۵۰ روپے تک وکݨ لگا اے، دوجے شہراں وچ وی آٹا سپلائی دی حالت ڈاڈھی خراب اے، جدکہ محکمہ فوڈ، پیرا تے ضلعی انتظامیہ آٹے تے روٹی دیاں قیمتاں کنٹرول کرن وچ ناکام ہو گئے نیں۔
تفصیلات مطابق کنک مہنگی ہوݨ پاروں لاہور دی اوپن مارکیٹ وچ ۱۰ کلو آٹے دے تھیلے دی سپلائی شدید متاثر ہو چکی اے، ایپر ایس دی روزانہ دی منگ ۲ لَکھ ۲۰ ہزار تھیلے اے، پر سپلائی وچ اک لَکھ ۱۰ ہزار تھیلاں دی کمی ساہمݨے آئی اے تے کئی چھوٹے وڈے سٹوراں تے ۱۰ کلو دا تھیلا لبھ ہی نہیں رہا تے ایس دی قیمت وی ۱ ہزار ۱۲۵ روپے تک اپڑ چکی اے، جدکہ لاہور سمیت دوجے شہراں وچ ۲۰ کلو دا تھیلا وی کریانہ تے وڈے میگا سٹوراں تے لبھنا اوکھا ہو چکا اے، البتہ ۱۵ کلو دا تھیلا ۲ ہزار ۱۵۰ روپے وچ وک رہا اے۔
آٹے دی قیمت وچ وادھے پاروں لاہور وچ سادہ روٹی دی قیمت وی ۲۰ روپے دی تھاں ۲۵ روپے تک جا اپڑی اے۔ دوجے پاسے لاہور دی اوپن مارکیٹ وچ کنک فی من ۴ ہزار ۶۵۰ روپے، راولپنڈی وچ ۴ ہزار ۷۵۰ روپے، اسلام آباد وچ ۴ ہزار ۸۰۰ روپے جدکہ کراچی تے پشاور وچ ۵ ہزار روپے وچ وک رہی اے۔
اوہرے ڈسٹرکٹ فوڈ کنٹرولر لاہور II فضل عباس شاہد نے دعویٰ کیتا اے کہ روزانہ اندازاً ۱ ہزار ۵۰۰ میٹرک ٹن کنک فلور ملز نوں دتی جا رہی اے، جدکہ ۱۰ کلو آٹے دے اندازاً ڈِڈھ لَکھ تھیلے مارکیٹ وچ سپلائی کیتے جا رہے نیں، نان بائیاں نوں وی روزانہ دی بنیاد تے آٹے دی باقاعدہ سپلائی جاری اے۔ اک مہینے دے دوران فلور ملز تے آٹا ڈیلراں دے ۴۵ لائسنس معطل کیتے گئے، تے مِلا کے ۶۰ لَکھ ۵۰ ہزار روپے جرمانہ وی لایا گیا اے۔
سیکرٹری فوڈ سیفٹی اینڈ کنزیومر پروٹیکشن ڈاکٹر کرن خورشید نے آکھیا اے کہ مارکیٹ وچ سپلائی باقاعدگی نال جاری اے تے سارے علاقیاں وچ وافر مقدار وچ آٹا لبھ رہا اے۔
