جماعت اسلامی احتجاج: پی ٹی آئی دے اسیر آگوآں نے حمایت کر دتی۔
مرکزی قیادت وی عوامی جدوجہد دی حمایت کرے: شاہ محمود، ڈاکٹر یاسمین تے ہور؛ عوام نوں ریلیف دی فراہمی لئی حکومت نوں فوری قدم چکݨے ہوݨ گے: مشترکہ بیان۔
لاہور : کوٹ لکھپت جیل وچ قید پی ٹی آئی آگوآں نے مہنگائی، پٹرولیم مصنوعات تے عائد لیوی تے بجلی دیاں ودھدیاں قیمتاں خلاف جماعتِ اسلامی دی ملک گیر احتجاجی تحریک تے دھرنیاں دی بھرپور حمایت دا اعلان کر دتا۔ اسیر پی ٹی آئی آگو شاہ محمود قریشی، ڈاکٹر یاسمین راشد، میاں محمود الرشید، عمر سرفراز چیمہ تے سینیٹر اعجاز چودھری دے دستخطاں نال جاری مشترکہ بیان وچ مزید آکھیا گیا اے کہ تحریکِ انصاف دی مرکزی قیادت وی جماعتِ اسلامی دی ایس عوامی جدوجہد دی حمایت دا اعلان کرے، عوام پہلے ہی مہنگائی تے بجلی و پٹرول دیاں قیمتاں وچ وادھے پاروں ڈاڈھی اوکڑ دا شکار نیں، ملک بھر دے نوجوان ایس احتجاجی مہم وچ ودھ چڑھ کے حصہ لیݨ تے حکومت نوں مجبور کرن کہ پٹرولیم مصنوعات تے عائد لیوی دا نظام ختم تے مہنگائی وچ کمی کیتی جائے، حکومت نوں عوام نوں ریلیف دیݨ لئی فوری قدم چکݨے ہوݨ گے، عوامی مسلاں دے حل لئی مشترکہ جدوجہد دی لوڑ اے۔
